whatsapp: భారీగా షేర్ అవుతున్న వైరస్... వాట్సప్ యూజర్లకు కేంద్ర భద్రతా ఏజెన్సీల హెచ్చరిక

---

సోషల్ మీడియా దిగ్గజం వాట్సప్ ద్వారా భార‌త్‌లో రెండు సంచ‌ల‌నాత్మక  వైరస్ ఫైల్స్ విప‌రీతంగా షేర్ అవుతున్నాయ‌ని కేంద్ర భద్రతా ఏజన్సీలు వినియోగ‌దారుల‌ను హెచ్చ‌రిస్తున్నాయి. అప్ర‌మ‌త్తంగా ఉండ‌క‌పోతే ప్ర‌మాద‌మేన‌ని చెబుతున్నాయి. ఈ యాప్ ద్వారా ఎన్డీఏ,(నేషనల్ డిఫెన్స్ అకాడమీ),  ఎన్ఐఎ(నేషనల్ ఇన్వెస్టిగేషన్ ఏజెన్సీ) పేరుతో ప్ర‌మాదక‌ర‌మైన వైర‌స్‌ను జోడిస్తూ ఈ పైల్స్‌ను పంపుతున్నార‌ని కేంద్ర భద్రతా ఏజన్సీలు చెప్పాయి. ఈ ఫైల్స్ ప్ర‌ధానంగా డిఫెన్స్ , సెక్యూరిటీ పారా మిలీటరీ, పోలీస్ విభాగంలోని సిబ్బందిని టార్గెట్ చేస్తూ వ‌స్తున్నాయ‌ని తెలిపాయి. దీంతో రక్షణ, భద్రతా సంస్థలు మ‌రింత అల‌ర్ట్‌గా ఉండాల్సిన అవ‌స‌రం ఉంద‌ని చెప్పాయి.

ఈ వైర‌స్‌ను ఎక్స్ ఎల్ ఫార్మాట్  లో ఉన్న ఫైల్ లో పంపుతున్నార‌ని కేంద్ర భద్రతా ఏజన్సీలు తెలిపాయి. ఈ వైర‌స్ స్మార్ట్‌ఫోన్‌లోకి చేరితే ఫోన్‌లోని యూజర్ల వ్యక్తిగత సమాచారం స‌హా మొబైల్‌ బ్యాంకింగ్ వివ‌రాలు హ్యాక‌ర్ల చేతికి వెళ్లిపోతాయ‌ని హెచ్చ‌రించాయి. ఈ వైరస్ మెసేజ్ ల ద్వారా యూజ‌ర్ల‌ బ్యాంకింగ్ పాస్ వర్డ్స్, పిన్‌ తదితర వివరాలను కొట్టేస్తార‌ని చెప్పాయి. ఎక్స్ ఎల్ ఫార్మాట్ల‌లోనే కాక‌ ఎంఎస్ వర్డ్,  పీడీఎఫ్ ఫార్మాట్లలో కూడా ఉండ‌వ‌చ్చ‌ని యూజ‌ర్ల‌కు సూచించాయి.  ప్ర‌సిద్ధి చెందిన సంస్థల పేరుతో ఈ  మెసేజ్‌లు వ‌స్తున్నాయ‌ని చెప్పాయి. ఇటువంటి మెసేజ్‌లు వ‌స్తే యూజ‌ర్లు వెంటనే సంబంధిత ఇన్ఫర్మేషన్ టెక్నాలజీ విభాగాలకు స‌మాచారం అందించాల‌ని కేంద్ర భద్రతా ఏజన్సీలు సూచించాయి.