Auto: ఈ ఘోరమైన యాక్సిడెంట్ ఎలా జరిగింది...?: ఆర్టీసీ డ్రైవర్ వర్షన్ ఇది
- విద్యార్థినుల ఆటోను ఢీకొన్న ఆర్టీసీ బస్సు
- ఐదుగురు దుర్మరణం
- బస్సును ఆటో ఓవర్ టేక్ చేయబోయిందన్న డ్రైవర్
- యాక్సిండెంట్ తో బాధ కలుగుతోందని వెల్లడి
ఈ ఉదయం గుంటూరు జిల్లాలో ఓ ఆర్టీసీ బస్సు, టెన్త్ క్లాస్ విద్యార్థినులతో ప్రయాణిస్తున్న ఆటో ఢీకొనగా, ఐదుగురు అక్కడికక్కడే మరణించిన సంగతి తెలిసిందే. ఈ ఘటన గురించిన వివరాలు, ప్రమాదానికి కారణాలను ఆర్టీసీ డ్రైవర్ వెల్లడించాడు. వేమవరం నుంచి పేరేచర్లకు బస్సు వెళుతోందని, ఆ సమయంలో మంచు చాలా ఎక్కువగా ఉండి, ఎదురుగా వస్తున్న వాహనాలు కనిపించని పరిస్థితి నెలకొందని చెప్పాడు.
ప్రమాద సమయంలో బస్సు మితిమీరిన వేగంతో వెళ్లడం లేదని చెప్పిన ఆయన, బస్సు ఓ టర్నింగ్ వద్దకు రాగానే, వెనక నుంచి వస్తున్న ఆటో, బస్సును ఓవర్ టేక్ చేసే ప్రయత్నం చేసిందని అన్నాడు. ఈ క్రమంలో ఆటోనే అదుపుతప్పి బస్సును ఢీకొందని, పొగమంచు కారణంగా వెనక వస్తున్న ఆటో తనకు కనిపించలేదని అన్నాడు. ఈ ఘటనలో నలుగురు బాలికలు చనిపోవడం తనకెంతో బాధను కలిగిస్తోందని చెప్పాడు. వెంటనే తాను బస్సును ఆపి ఆటోలో గాయపడిన వారిని ఆసుపత్రులకు తరలించేందుకు సాయం చేశానని చెప్పాడు. రోడ్డు మధ్యలో డివైడర్ లేకపోవడం, పొగమంచు కమ్మేయడం ప్రమాదానికి కారణాలన్నాడు.
