cong: రాజస్థాన్ ఉపఎన్నికలు: మూడు స్థానాలూ కాంగ్రెస్ ఖాతాలోకే!
- ఒక అసెంబ్లీ, రెండు పార్లమెంట్ స్థానాలకు జరిగిన ఉపఎన్నిక
- మూడుకు మూడూ కాంగ్రెస్ కే
- బీజేపీ ఘోర పరాజయం
రాజస్థాన్ లో మూడు స్థానాలకు జరిగిన ఉపఎన్నికలలో కమలం వాడిపోగా, కాంగ్రెస్ అన్ని స్థానాల్లో గెలిచి తన సత్తా చాటుకుంది. మందల్ గఢ్ అసెంబ్లీ నియోజకవర్గంతో పాటు, అజ్మీర్, అల్మార్ పార్లమెంటరీ స్థానాల్లో బీజేపీ ఓటమిపాలైంది. ఇటీవల ఈ ఉపఎన్నికలు జరగగా, ఓట్ల లెక్కింపు ఈ రోజు నిర్వహించారు. ఈ విజయం నేపథ్యంలో కాంగ్రెస్ పార్టీ అధ్యక్షుడు రాహుల్ గాంధీ మీడియాతో మాట్లాడుతూ, ‘వెల్ డన్ రాజస్థాన్ కాంగ్రెస్! ప్రతిఒక్కరినీ చూసి గర్వపడుతున్నా. బీజేపీని రాజస్థాన్ ప్రజలు తిరస్కరించారనడానికి ఈ విజయం అద్దం పడుతోంది’ అన్నారు.
కాగా, రాజస్థాన్ లో బీజేపీ పరాజయం పాలవడంపై ఆ పార్టీ నేత కైలాశ్ విజయ్ వార్గియా స్పందిస్తూ, ఈ ఉపఎన్నికలో తమ పార్టీ పరాజయానికి గల కారణాలను తెలుసుకుంటామని, కేవలం, ఈ ఫలితాలను ఆధారంగా చేసుకుని ఏవో ఊహించుకోకూడదని అన్నారు. కాగా, ఈ ఉపఎన్నిక ఫలితాలు రాజస్థాన్ లోని అధికార బీజేపీికి మింగుడుపడటం లేదు.