Chandrababu: చంద్రబాబుతో భూమా కుటుంబ సభ్యులు, ఏవీ సుబ్బారెడ్డి భేటీ
- అమరావతిలో కొనసాగుతోన్న భేటీ
- అంతకు ముందు అఖిలప్రియతో చర్చించిన వర్ల రామయ్య
- రెండు రోజులగా వాయిదా పడుతూ వచ్చిన భేటీ
ఇటీవల సైకిల్‌ ర్యాలీ నిర్వహిస్తోన్న నేపథ్యంలో టీడీపీ నేత ఏవీ సుబ్బారెడ్డిపై రాళ్లదాడి జరగడం అలజడి రేపిన విషయం తెలిసిందే. ఈ దాడితో ఆంధ్రప్రదేశ్‌ మంత్రి అఖిలప్రియ, ఏవీ సుబ్బారెడ్డి మధ్య ఉన్న విభేదాలు మరోసారి తారస్థాయికి చేరాయి. దీంతో ఆంధ్రప్రదేశ్‌ ముఖ్యమంత్రి చంద్రబాబు నాయుడు ఈ రోజు ఆ ఇరువురితో అమరావతిలో భేటీ అయి వివరణ అడుగుతున్నారు.
మంత్రి అఖిలప్రియ తన కుటుంబ సభ్యులతో కలిసి ఈ భేటీలో పాల్గొంటున్నారు. కాగా, చంద్రబాబుతో సమావేశానికి ముందు మంత్రి అఖిలప్రియతో టీడీపీ నేత వర్ల రామయ్య చర్చించారు. ఆయన కూడా ఈ భేటీలో పాల్గొంటున్నట్లు సమాచారం. ఈ భేటీ నిర్వహించాలని రెండు రోజులుగా చంద్రబాబు ప్రయత్నిస్తున్నప్పటికీ మంత్రి అఖిలప్రియకు సమయం కుదరకపోవడంతో వాయిదాపడుతూ వస్తోన్న విషయం తెలిసిందే.