Jagan: జగన్‌ సీఎం అవుతారని విష్ణుకుమార్‌ రాజు అన్నారు.. దీన్ని బట్టే తెలుస్తోంది: సీపీఐ రామకృష్ణ
- బీజేపీ, వైసీపీ లాలూచీ
- విష్ణుకుమార్‌ రాజు వ్యాఖ్యలే నిదర్శనం
- వైసీపీ, బీజేపీ కలిసిపోయాయా?
- ఆయా పార్టీలు సమాధానం చెప్పాలి
రాజకీయ నేతలు ఎవరైనా తమ పార్టీ ఎన్నికల్లో గెలుస్తుందని చెప్పుకోవచ్చని, అలాగే మిత్ర పక్షం గెలుస్తుందని చెప్పుకోవచ్చని కానీ, బీజేపీ ఎమ్మెల్యే విష్ణుకుమార్‌ రాజు మాత్రం వచ్చే ఎన్నికల్లో వైసీపీ గెలిచి, జగన్‌ సీఎం అవుతారని అన్నారని సీపీఐ ఏపీ కార్యదర్శి రామకృష్ణ అన్నారు. ఈ రోజు విజయవాడలో ఆయన మీడియాతో మాట్లాడుతూ... బీజేపీ, వైసీపీ లాలూచీకి విష్ణుకుమార్‌ రాజు వ్యాఖ్యలే నిదర్శనమని అన్నారు.
వైసీపీ, బీజేపీ కలిసిపోయాయా? అనే విషయంపై ఆయా పార్టీలు సమాధానం చెప్పాలని రామకృష్ణ డిమాండ్ చేశారు. ప్రత్యేక హోదా విషయంలో ప్రధానమంత్రి నరేంద్ర మోదీని వైసీపీ ఒక్కసారి కూడా విమర్శించలేదని అన్నారు. కర్ణాటక అసెంబ్లీ ఎన్నికల్లో 'గాలి' సోదరులకు టిక్కెట్లు ఇచ్చినట్టు, ఏపీలో కూడా వైసీపీ, బీజేపీ కలిసిపోయాయా? అని ప్రశ్నించారు. వైసీపీ గురించి ఆ పార్టీ నాయకుల కంటే ఎక్కువగా బీజేపీ నేతలే ఎక్కువగా ప్రశంసిస్తూ మాట్లాడుతున్నారని వ్యాఖ్యానించారు. వచ్చే ఎన్నికల్లో ప్రజలు బీజేపికి బుద్ధి చెబుతారని అన్నారు.