Hyderabad: చాంద్రాయణగుట్ట బీజేపీ అభ్యర్థికి బెదిరింపులు.. గట్టి పోలీస్ భద్రతను కల్పించిన ప్రభుత్వం!
- చాంద్రాయణగుట్ట నుంచి షహజాదీ పోటీ
- దాడి చేస్తామంటూ సోషల్ మీడియాలో వార్నింగ్
- పోలీసులను ఆశ్రయించిన బీజేపీ నేత
చాంద్రాయణగుట్ట బీజేపీ ఎమ్మెల్యే అభ్యర్థి సయ్యద్ షహజాదీకి తెలంగాణ ప్రభుత్వం గట్టి భద్రతను కల్పించింది. చాంద్రాయణగుట్టలో ప్రచారానికి దిగితే దాడిచేస్తామని కొందరు దుండగులు హెచ్చరించడంతో ఆమె పోలీసులను ఆశ్రయించారు. ఈ సందర్భంగా ఆమెకు ఇద్దరు గన్ మెన్లను కేటాయించాలని ప్రభుత్వం ఆదేశాలు జారీచేసింది.
ఈ విషయమై ఫలక్‌నుమా ఏసీపీ డాక్టర్ రషీద్, దక్షిణ మండలం డీసీపీ అంబర్ కిశోర్ ఝా మాట్లాడుతూ.. షహజాదీపై దాడి చేస్తామని సోషల్ మీడియాలో కొందరు దుండగులు హెచ్చరించారని తెలిపారు. ఈ ఘటనపై ఇప్పటికే కేసు నమోదు చేశామన్నారు. భద్రత కోసం షహజాదీకి ఇద్దరు గన్ మెన్లను కేటాయించామని పేర్కొన్నారు. నిందితులను త్వరలోనే అరెస్ట్ చేస్తామని అన్నారు. ఏఐఎంఐఎం నేత అక్బరుద్దీన్ ఒవైసీని ఓడించేందుకు ఉన్నత విద్యావంతురాలైన షహజాదీని బీజేపీ రంగంలోకి దించింది.
