tirupathi: సంక్షేమ పథకాల ద్వారా మాత్రమే పేదరికం దూరం కాదు: సీఎం చంద్రబాబునాయుడు
- ఆదాయం కల్పించేలా ఆలోచనలు సాగాలి
- అన్న క్యాంటీన్ల ద్వారా పేదవాడి ఆకలి తీరుస్తున్నాం
- అనంతపురంలో సౌత్ కొరియా టౌన్ షిప్
సంక్షేమ పథకాల ద్వారా మాత్రమే పేదరికం దూరం కాదని, ప్రతి కుటుంబానికి ఆదాయం కల్పించేలా ఆలోచనలు సాగాలని సీఎం చంద్రబాబునాయుడు అన్నారు. తిరుపతిలో నిర్వహించిన ‘పేదరికంపై గెలుపు’ కార్యక్రమంలో ఆయన పాల్గొన్నారు. ఈ కార్యక్రమానికి మంత్రులు ఫరూక్, అచ్చెన్నాయుడు, అమరనాథ్ రెడ్డి తదితరులు హాజరయ్యారు.
ఈ కార్యక్రమంలో భాగంగా 10,138 మంది లబ్ధిదారులకు పనిముట్లు, నిధులు పంపిణీ చేశారు. ఈ సందర్భంగా చంద్రబాబు మాట్లాడుతూ, ఏపీలో అన్న క్యాంటీన్లు ఏర్పాటు చేయడం ద్వారా పేదవాడి ఆకలి తీరుస్తున్నామని, రూ.5కే పేదవాడి ఆకలి తీర్చే పథకం దేశంలో మరెక్కడా లేదని అన్నారు. ‘ఆదరణ-2’లో రెండు లక్షల మందికి ప్రభుత్వ సాయం అందించామని, కమ్యూనిటీ గోకులాలు నిర్మించి, మహిళా సంఘాలకు అప్పగిస్తామని చెప్పారు. పేదలకు 25 లక్షల ఇళ్లు నిర్మించి ఇస్తున్న ప్రభుత్వం తమదని, అనంతపురం జిల్లాలో సౌత్ కొరియా టౌన్ షిప్ ఏర్పాటు చేస్తామని అన్నారు.
