Rishabh panth: మైదానంలో పంత్‌పై ‘భారత్ ఆర్మీ’ పాట.. ఉత్సాహంగా పెదవి కలిపిన అభిమానులు
- మాకొక పంత్ ఉన్నాడంటూ పాట
- సిక్సర్లూ కొడతాడు.. పిల్లల్నీ ఆడిస్తాడంటూ సాగిన పాట
- సోషల్ మీడియాలో వైరల్
టీమిండియా వికెట్ కీపర్-బ్యాట్స్‌మన్ రిషభ్ పంత్ బ్యాటింగ్ చేస్తున్నప్పుడు అభిమానులు ఆయనపై పాడిన పాట వైరల్ అవుతోంది. ఆసీస్ కెప్టెన్ టిమ్ పైన్- రిషభ్ పంత్ మధ్య ఓ రేంజ్‌లో స్లెడ్జింగ్ జరిగింది. అయితే, దానిని మైదానానికే పరిమితం చేసిన పంత్-పైన్‌లు ఆ తర్వాత చక్కగా కలిసిపోయారు. న్యూ ఇయర్ సందర్భంగా పైన్ పిల్లల్ని పంత్ ఎత్తుకుని ఆడించాడు.
ఇక శుక్రవారం పంత్ బ్యాటింగ్‌లో రెచ్చిపోతున్నప్పుడు ‘భారత్ ఆర్మీ’ అనే టీమిండియా అభిమానుల బృందం పాటందుకుంది. పంత్-పైన్ మధ్య జరిగిన స్లెడ్జింగ్‌ను గుర్తుకు తెస్తూ పాట సాగింది. ‘మాకు పంత్ ఉన్నాడు.. రిషభ్ పంత్, ఈ విషయం మీకు అర్థం అయిందని నేననుకోను, అతడు సిక్సర్లూ కొట్టగలడు, పిల్లల్నీ ఆడించగలడు’’ (వియ్ హ్యావ్ గాట్.. రిషభ్ పంత్, ఐ జస్ట్ డోంట్ థింక్ యు విల్ అండర్‌స్టాండ్, హి విల్ హిట్ యు ఫర్ సిక్స్, హి విల్ బేబీసిట్ యువర్ కిడ్స్) అని పాటపాడుతూ స్టేడియాన్ని హోరెత్తించారు. వారి పాటకు స్టేడియంలోని అభిమానులు కూడా పెదవి కలుపుతూ ఉత్సాహాన్ని నింపారు.
