Hyderabad: ప్రేమికులకు మెట్రో లిఫ్టులు ఎంతో 'ముద్దు'!
- లిఫ్ట్ పైకి వెళ్లే ఆ కాస్త సమయాన్ని సద్వినియోగం చేసుకుంటున్న కుర్రకారు
- దృశ్యాలు చూసి అవాక్కైన మెట్రో సిబ్బంది
- సోషల్ మీడియాలో వైరల్
హైదరాబాద్‌లోని మెట్రో స్టేషన్‌లో వృద్ధులు, వికలాంగుల కోసం ఏర్పాటు చేసిన లిఫ్టులు ప్రేమికులకు అడ్డాగా మారుతున్నాయి. నాలుగు వైపులా మూసుకుని ఉండే ఈ ఎలివేటర్లు ప్రేమికులకు హాట్ స్పాట్‌గా మారాయి. నిత్యం రద్దీగా ఉండే నగరంలో కాసింత ఏకాంతం కోరుకునే ప్రేమికులకు మెట్రో లిఫ్ట్‌లు ఎడారిలో ఒయాసిస్సులా కనిపిస్తున్నాయి.
ఈ లిఫ్ట్‌లలో సీసీటీవీలు ఉన్నాయన్న సంగతిని గుర్తించని ప్రేమికులు ఆ కాస్త సమయంలోనే ముద్దు ముచ్చట తీర్చుకుంటున్నారు. ఇటీవల ఈ సీసీటీవీ ఫుటేజీలను గమనించిన సిబ్బంది అందులోని దృశ్యాలు చూసి ఆశ్చర్యపోయారు. వెంటనే వాటిని పోలీసులకు అందించారు. లిఫ్ట్‌లలో అధర చుంబనాలు కానిచ్చేస్తున్న వారంతా ఇంటర్, డిగ్రీ చదివే వారు కావడం గమనార్హం. ఇప్పుడీ దృశ్యాలు సోషల్ మీడియాలోనూ వైరల్ అవుతున్నాయి.