Uttarkhand: మరో వివాదంలో బీజేపీ ఎమ్మెల్యే ..మందు కొట్టి.. తుపాకులు పట్టుకుని డ్యాన్స్!
- ఉత్తరాఖండ్ కు చెందిన ఎమ్మెల్యే కున్వర్ ప్రణవ్ సింగ్
- తన అనుచరులతో కలిసి ఓ హోటల్ లో ఎంజాయ్
- సామాజిక మాధ్యమాలకు చేరిన వీడియో
ఉత్తరాఖండ్ లోని ఖాన్ పూర్ నియోజకవర్గ బీజేపీ ఎమ్మెల్యే కున్వర్ ప్రణవ్ సింగ్ వివాదాలకు మారుపేరు. ఇటీవలే తన కాలికి శస్త్ర చికిత్స చేయించుకుని ఆసుపత్రి నుంచి డిశ్చార్జ్ అయ్యారు. ఈ సంతోషంలో తన అనుచరులతో కలిసి డెహ్రాడూన్ లోని ఓ హోటల్ లో ఎంజాయ్ చేశారు. మద్యం సేవిస్తూ, ఓ బాలీవుడ్ పాటకు ప్రణవ్ చిందేశారు. అయితే, మందేసి, చిందేసిన ప్రణవ్ తన తుపాకులను చేతిలో పెట్టుకుని ప్రదర్శించడం సంచలనం రేకెత్తిస్తోంది. ఇందుకు సంబంధించిన ఓ వీడియో సామాజిక మాధ్యమాలకు చేరడంతో ఈ విషయం బయటపడింది. దీనిపై నెటిజన్లు విమర్శల వర్షం కురిపిస్తున్నారు. గతంలో వివాదాస్పద వ్యాఖ్యలు చేసిన ప్రణవ్ ను పార్టీ నుంచి కొన్ని నెలల పాటు బహిష్కరించారు. మరోమారు వివాదంలో చిక్కుకున్న ప్రణవ్ పై బీజేపీ అధిష్ఠానం ఆగ్రహం వ్యక్తం చేసినట్టు సమాచారం.