Hyderabad: పెళ్లయిందన్న విషయాన్ని దాచిపెట్టి.. మరో యువతిని పెళ్లాడిన ఆర్మీ జవాను అరెస్ట్
- ప్రేమకు దారితీసిన పరిచయం
- ఆలయంలో యువతి మెడలో తాళి
- మోసపోయిన యువతి ఫిర్యాదుతో అరదండాలు
పెళ్లై పిల్లలున్న విషయాన్ని దాచిపెట్టి మరో యువతిని మోసగించి పెళ్లాడిన ఆర్మీ జవానుకు పోలీసులు అరదండాలు వేశారు. రాచకొండ పోలీసుల కథనం ప్రకారం.. ఆదిలాబాద్ జిల్లాకు చెందిన సురపం రమేశ్ (29)కు 8 ఏళ్ల క్రితం ఓ మహిళతో వివాహమైంది. వీరికి ఏడేళ్ల కుమార్తె ఉంది. ఆర్మీలో జవానుగా పనిచేస్తున్న రమేశ్ హైదరాబాద్‌లోని బాలాజీనగర్‌లో ఉంటున్న స్నేహితుడి ఇంటికి తరచూ వచ్చేవాడు. ఈ క్రమంలో అదే ప్రాంతానికి చెందిన ఓ యువతి (22)తో అతడికి పరిచయం ఏర్పడింది. అది కాస్తా ప్రేమకు దారితీసింది.
అయితే, తనకు వివాహమైందన్న విషయాన్ని దాచిపెట్టిన రమేశ్.. ఆమెను ఆదిలాబాద్ తీసుకెళ్లి ఓ దేవాలయంలో వివాహం చేసుకున్నాడు. అనంతరం బాలాజీనగర్‌కు తీసుకొచ్చి కాపురం పెట్టాడు. విషయం తెలిసిన భార్య ఈ నెల 23న వారిని నిలదీసింది. అనంతరం భర్తను తీసుకుని వెళ్లిపోయింది. దీంతో తాను మోసపోయిన విషయాన్ని గుర్తించిన యువతి జవహర్‌నగర్ పోలీసులకు ఫిర్యాదు చేసింది. కేసు నమోదు చేసుకున్న పోలీసులు శుక్రవారం నిందితుడు రమేశ్‌ను అరెస్ట్ చేసి రిమాండ్‌కు తరలించారు.