Whatsapp: ఎంపీ4 వీడియో ఫైల్స్ రూపంలో వాట్సాప్ పై హ్యాకర్ల దాడి!
- ఇటీవలే వాట్సాప్ పై విరుచుకుపడిన 'పెగాసస్'
- హ్యాకర్లు దాడికి ప్రయత్నిస్తున్నట్టు వాట్సాప్ మాతృసంస్థ ఫేస్ బుక్ వెల్లడి
- వీడియో ఫైల్స్ వచ్చినప్పుడు జాగ్రత్తగా ఉండాలని సూచన
ఇటీవలే ప్రపంచవ్యాప్తంగా వాట్సాప్ యూజర్లు 'పెగాసస్' అనే స్పైవేర్ బారినపడిన విషయం తీవ్ర ప్రకంపనలు సృష్టించింది. ఆ విషయం మరుగున పడకముందే హ్యాకర్లు మరో రూపంలో వాట్సాప్ పై విరుచుకుపడ్డారు. వాట్సాప్ లోని ఓ చిన్న లోపాన్ని ఆధారంగా చేసుకుని ఎంపీ4 వీడియో ఫైల్స్ రూపంలో దాడులకు ప్రయత్నిస్తున్నట్టు తెలిసింది. ఈ మేరకు వాట్సాప్ మాతృ సంస్థ ఫేస్ బుక్ ఓ ప్రకటనలో తెలిపింది.
గుర్తు తెలియని సోర్స్ ద్వారా వీడియో లింకులు వచ్చినప్పుడు అప్రమత్తంగా ఉండాలని వాట్సాప్ యూజర్లకు స్పష్టం చేసింది. ఫోన్ లో ఆటో డౌన్ లోడ్ ఆప్షన్ ను డిజేబుల్ చేయడం ద్వారా ఈ ముప్పు నుంచి తప్పించుకోవచ్చని పేర్కొంది. వాట్సాప్ లేటెస్ట్ వెర్షన్ ను ఇన్ స్టాల్ చేసుకుంటే సైబర్ దాడుల తీవ్రత తగ్గుతుందని వెల్లడించింది.