Ola: ఓలా, ఊబర్ క్యాబ్ లలో షేరింగ్ ప్రయాణం నిలిపివేత!
- పూల్ సర్వీస్, పూల్ రైడ్లు రద్దు చేస్తున్నట్లు ప్రకటన
- ఇకపై ఒకే కుటుంబం వారికి అనుమతి
- కరోనా ప్రభావం నేపథ్యంలో రెండు సంస్థలు నిర్ణయం
దేశంలోని ప్రముఖ క్యాబ్ సంస్థలు ఓలా, ఊబర్ సంస్థలు పూల్ సర్వీస్, పూల్ రైడర్లను తాత్కాలికంగా రద్దుచేస్తున్నట్లు ప్రకటించాయి. దేశవ్యాప్తంగా కరోనా ప్రభావం తీవ్రంగా ఉన్న నేపథ్యంలో సామాజిక బాధ్యతగా ఈ నిర్ణయం తీసుకున్నట్లు సంస్థలు పేర్కొన్నాయి. క్యాబ్ సర్వీస్ ను షేర్ చేసుకునే సదుపాయాన్ని రద్దు చేస్తున్నట్లు ప్రకటించాయి.
'కరోనా వైరస్ కారణంగా సామాజిక బాధ్యతగా ఈ నిర్ణయం తీసుకున్నాం. ఇకపై ఒకే కుటుంబానికి చెందిన వారు మాత్రమే ప్రయణించే సౌకర్యం అందుబాటులో ఉంటుంది. వాస్తవంగా గత కొన్నాళ్లుగా క్యాబ్ బుకింగ్ బాగా తగ్గిపోయింది. అత్యవసరమైతే తప్ప జనం బయటకు రాకపోవడమే దీనికి కారణం. ఈ పరిస్థితుల్లో దీనివల్ల నష్టమే అయినా మా వంతుగా కూడా బాధ్యత పాటించాలని ఈ నిర్ణయం తీసుకున్నాం' అని ఆ సంస్థలు ప్రకటించాయి. అలాగే క్యాబ్ లు పరిశుభ్రంగా ఉండేలా కూడా చర్యలు తీసుకుంటున్నట్లు తెలిపాయి.
