CCMB: కేసీఆర్ విజ్ఞప్తికి కేంద్రం స్పందన.. సీసీఎంబీలో ‘కరోనా’ నిర్ధారణ పరీక్షలకు అనుమతి!
- సీసీఎంబీలో ‘కరోనా’ నిర్ధారణ పరీక్షలకు అనుమతించాలని ఇటీవల కోరిన కేసీఆర్
- ఈ మేరకు అనుమతిస్తూ సీసీఎంబీకి ఆదేశాలు జారీ
- రేపటి నుంచి సీసీఎంబీలో ‘కరోనా’ నిర్ధారణ పరీక్షలు
హైదరాబాద్ లోని సెంటర్ ఫర్ సెల్యులార్ అండ్ మాలిక్యులర్ బయాలజీ (సీసీఎంబీ)లో కరోనా వైరస్ నిర్ధారణ పరీక్షలకు అనుమతించాలన్న తెలంగాణ సీఎం కేసీఆర్ విజ్ఞప్తికి కేంద్ర ప్రభుత్వం స్పందించింది. ఈ మేరకు అనుమతినిస్తూ సీసీఎంబీకి ఆదేశాలు జారీ చేసింది. ఈ ఆదేశాల నేపథ్యంలో రేపటి నుంచి ‘కరోనా’ నిర్ధారణ పరీక్షలు సీసీఎంబీలో కూడా నిర్వహించనున్నారు. గాంధీ ఆసుపత్రి నుంచి సీసీఎంబీకి శాంపిల్స్ పంపేందుకు ఏర్పాట్లు ప్రారంభించినట్టు సమాచారం.
కాగా, వివిధ రాష్ట్రాల ముఖ్యమంత్రులతో ప్రధాని మోదీ ఇటీవలే వీడియో కాన్ఫరెన్స్ నిర్వహించారు. ఈ సందర్భంగా, సీసీఎంబీలో కరోనా నిర్ధారణ పరీక్షలకు అనుమతించాలని, ఇక్కడైతే ఒకేసారి 800 నుంచి 1000 వరకు నమూనాలను పరీక్షించే అవకాశం ఉంటుందన్న విషయాన్ని మోదీ దృష్టికి కేసీఆర్ తీసుకెళ్లారు.