Srikalahasti: శ్రీకాళహస్తిలో పెరుగుతున్న కరోనా కేసులు
- కొత్తగా రెండు పాజిటివ్ కేసుల నమోదు
- ఇద్దరూ గతంలో క్వారంటైన్లో ఉన్నవారే
- అనుమానం ఉన్నవారందరినీ క్వారంటైన్లో ఉంచుతున్నామన్న కలెక్టర్
ఏపీలో కరోనా కేసులు అమాంతం పెరుగుతున్నాయి. చిత్తూరు జిల్లాలోని ప్రముఖ ఆథ్యాత్మిక క్షేత్రమైన శ్రీకాళహస్తిలో కొత్తగా మరో రెండు కేసులు నమోదయ్యాయి. ఈ ఇద్దరూ గతంలో క్వారంటైన్ లో ఉన్నవారేనని జిల్లా కలెక్టర్ తెలిపారు. ఇప్పటికే ఇక్కడ మూడు కేసులు నమోదయ్యాయి.
ఈ ముగ్గురిలో ఒకరు లండన్ నుంచి వచ్చిన వ్యక్తి కాగా... మరో ఇద్దరు ఢిల్లీ ప్రార్థనలకు వెళ్లి వచ్చినవారు. ఈ సందర్భంగా జిల్లా కలెక్టర్ భరత్ నారాయణ గుప్త మాట్లాడుతూ, కరోనా ఏ వయసు వారికైనా సోకుతుందని ప్రజలను హెచ్చరించారు. అనుమానం ఉన్న ప్రతి ఒక్కరిని క్వారంటైన్ లో ఉంచుతున్నామని చెప్పారు. ఇప్పుడు పాజిటివ్ వచ్చిన ఇద్దరూ కూడా గతంలో క్వారంటైన్ లో ఉన్నవారేనని తెలిపారు.