Gujarath: పీపీఈ కిట్లు ధరించి హెయిర్ కటింగ్.. ఫొటో వైరల్
- గుజరాత్‌, ఖేడా ప్రాంతంలోని సెలూన్ లో ఏర్పాటు
- కస్టమర్లు కూడా అన్ని జాగ్రత్తలు తీసుకునేలా చర్యలు
- క్షురకులు, కస్టమర్లకు కరోనా సోకకుండా జాగ్రత్తలు
కరోనా విజృంభణ నేపథ్యంలో విధించిన లాక్‌డౌన్‌లో సడలింపులు ఇవ్వడంతో దేశంలోని పలు ప్రాంతాల్లో హెయిర్ కటింగ్ సెలూన్లు తెరుచుకున్నాయి. అయితే, హెయిర్ కటింగ్ సెలూన్‌ల ద్వారా కరోనా వైరస్ వ్యాప్తి అధికంగా జరిగే అవకాశం ఉంటుంది. ఈ నేపథ్యంలో గుజరాత్‌లోని ఖేడా ప్రాంతంలో ఓ హెయిర్ కటింగ్ సెలూన్‌లో క్షురకుడు అన్ని జాగ్రత్తలు తీసుకుంటూ కటింగ్ చేస్తోన్న ఫొటోలు వైరల్ అవుతున్నాయి.
అతడు వ్యక్తిగత పరిరక్షణ పరికరాలు (పీపీఈ) ధరించి మరీ హెయిర్ కటింగ్ చేస్తున్నాడు. అంతేకాదు, ఆ సెలూన్‌లో కస్టమర్లు కూడా అన్ని జాగ్రత్తలు పాటించేలా క్షురకుడు చర్యలు తీసుకుంటున్నాడు. ఆ సెలూన్‌కు వచ్చిన కస్టమర్లు భౌతిక దూరం పాటిస్తూ, మాస్కులు ధరించి ఉన్నారు.
'ప్రభుత్వం సూచించిన అన్ని జాగ్రత్తలను మేము తీసుకుంటున్నాం. క్షురకులు, కస్టమర్లకు కరోనా సోకకుండా అన్ని చర్యలు తీసుకుంటున్నాం' అని ఆ సెలూన్ యజమాని విశాల్ లింయాచియా మీడియాకు తెలిపారు. కరోనా నుంచి కాపాడడానికి పీపీఈ కిట్లు అద్భుతంగా పనిచేస్తాయి.
