Actor: తెలుగు టీవీ సీరియల్ నటుడికి కరోనా పాజిటివ్... షూటింగ్ నిలిపివేత
- తిరుపతి నుంచి నేరుగా షూటింగ్ కు వచ్చిన నటుడు
- యూనిట్ సభ్యులందరికీ క్వారంటైన్
- నటుడు ఎవర్ని కలిశాడన్న దానిపై పోలీసుల ఆరా
లాక్ డౌన్ సడలింపుల నేపథ్యంలో ఇటీవలే సినీ, టీవీ షూటింగులు పునఃప్రారంభమయ్యాయి. భౌతికదూరం పాటించాలని, పరిశుభ్రతకు ప్రాధాన్యత ఇవ్వాలని ప్రభుత్వాలు సినీ, టీవీ పరిశ్రమలకు స్పష్టం చేశాయి. కానీ, ఓ తెలుగు టీవీ సీరియల్ యూనిట్లో కరోనా కలకలం రేగింది. సీరియల్లో నటిస్తున్న ఓ నటుడికి కరోనా పాజిటివ్ అని తేలింది. దాంతో ఆ ధారావాహిక షూటింగ్ నిలిపివేశారు. యూనిట్ సభ్యులను క్వారంటైన్ కు పంపారు. కాగా, ఈ తెలుగు టీవీ సీరియల్ ప్రముఖ చానల్లో ప్రసారమవుతోంది.
కరోనా సోకిన నటుడు తిరుపతి నుంచి నేరుగా షూటింగ్ కు వచ్చినట్టు తెలుస్తోంది. ఆ నటుడు ఎవరెవరిని కలిశాడన్న దానిపై పోలీసులు ఆరా తీస్తున్నారు. సుదీర్ఘ లాక్ డౌన్ తర్వాత షూటింగులు ప్రారంభమయ్యాయన్న ఆనందంలో ఉన్న బుల్లితెర నటీనటులు ఈ పరిణామంతో నిరుత్సాహానికి గురయ్యారు. ఈ ఘటన మిగతా టీవీ సీరియళ్లపైనా ప్రభావం చూపే అవకాశం ఉందని భావిస్తున్నారు.
