Hatras: బాధితురాలు ధనవంతుల బిడ్డ అయితే ఇలాగే చేస్తారా?: అలహాబాద్ హైకోర్టు సూటి ప్రశ్న
- రేప్ కేసును సుమోటోగా స్వీకరించిన హైకోర్టు
- మేజిస్ట్రేట్ సహా పలువురు అధికారులకు సమన్లు
- అర్థరాత్రి 2 గంటల సమయంలో అంత్యక్రియలేంటి?
- కనీస మానవత్వాన్ని చూపించలేదన్న న్యాయస్థానం
హత్రాస్ హత్యాచార బాధితురాలి విషయంలో వాదనలు జరుగుతున్న వేళ, అలహాబాద్ హైకోర్టు, ఆర్థిక, కులాల ప్రస్తావన తీసుకుని వచ్చి సంచలన వ్యాఖ్యలు చేసింది. ఈ కేసులో బాధితురాలి అంత్యక్రియలను జరిపించిన తీరును తీవ్రంగా తప్పుబడుతూ, అర్థరాత్రి 2 గంటల సమయంలో హడావుడిగా మృతదేహాన్ని దహనం చేయడాన్ని ప్రశ్నించింది. బాధితురాలు ధనవంతుల బిడ్డ అయితే, ఇలాగే చేస్తారా? అని పోలీసులను ప్రశ్నించింది.
అలహాబాద్ హైకోర్టు లక్నో బెంచ్, ఈ కేసు విచారణను చేపట్టి, పోలీసుల తీరును దుయ్యబట్టగా, స్థానిక పరిస్థితులు, లా అండ్ ఆర్డర్ ను దృష్టిలో పెట్టుకుని తాము ఆ చర్యలు తీసుకున్నామని అధికారులు కోర్టుకు వెల్లడించారు. ఆ బాలిక పేద కుటుంబానికి చెందకుండా, డబ్బున్న వారి ఇంటి అమ్మాయే అయితే, పోలీసులు ఈ కేసును మరో కోణంలో తీసుకుని ఉండేవారని ఈ సందర్భంగా న్యాయమూర్తి వ్యాఖ్యానించారు.
ఈ కేసును కోర్టు కూడా తీవ్రంగా పరిగణిస్తోందని బాధితురాలి కుటుంబం తరఫున వాదనలు వినిపిస్తున్న న్యాయవాది సీమా కుశాహ్వా వెల్లడించారు. ఈ కేసులో జిల్లా మెజిస్ట్రేట్ ప్రవీణ్ కుమార్ సహా పలువురు అధికారులకు కోర్టు ఇప్పటికే సమన్లు జారీ చేసిన సంగతి తెలిసిందే. అర్థరాత్రి పూట దహన సంస్కారాలకు ఆయన కూడా కారణమేనన్న అభియోగాలు నమోదయ్యాయి.
అక్టోబర్ 1 న కేసును సుమోటోగా స్వీకరించిన న్యాయస్థానం, ఈ విషయంలో పోలీసులు కనీస మానవ హక్కులను, మృతురాలి బంధుమిత్రుల ఆకాంక్షలను పరిగణనలోకి తీసుకోలేదని, మృతురాలి ఇంట్లో బంధువులు ఉండగా, తాళం వేసి మరీ అంత్యక్రియలు ఎందుకు ముగించారని ప్రశ్నించింది. కడసారి చూపులకు కూడా వారిని దూరంచేయడం మానవత్వం అనిపించుకోదని వ్యాఖ్యానించింది.
