Atchannaidu: అచ్చెన్నాయుడికి రెండు వారాల రిమాండ్... జిల్లా జైలుకు తరలింపు
- ఈ ఉదయం నిమ్మాడలో అచ్చెన్న అరెస్ట్
- సర్పంచ్ అభ్యర్థిని బెదిరించినట్టు ఆరోపణలు
- కోర్టులో హాజరు పరిచిన పోలీసులు
- ఈ నెల 15 వరకు రిమాండ్
ఇటీవలే ఈఎస్ఐ స్కాంలో జైలుకు వెళ్లొచ్చిన ఏపీ టీడీపీ అధ్యక్షుడు కింజరాపు అచ్చెన్నాయుడు మరోసారి జైలు పాలయ్యారు. నిమ్మాడలో సర్పంచ్ అభ్యర్థిని బెదిరించినట్టు ఆరోపణలు ఎదుర్కొంటున్న అచ్చెన్నాయుడిని ఈ ఉదయం పోలీసులు అరెస్ట్ చేయడం తెలిసిందే.
అచ్చెన్నను పోలీసులు కోటబొమ్మాళి సెషన్స్ కోర్టులో హాజరు పర్చగా, ఆయనకు న్యాయమూర్తి రెండు వారాల పాటు అంటే ఈ నెల 15 వరకు రిమాండ్ విధించారు. దాంతో పోలీసులు అచ్చెన్నాయుడిని అంపోలు లోని జిల్లా జైలుకు తరలించారు. అటు, అచ్చెన్నాయుడి అరెస్ట్, ఇటు పార్టీ అధికార ప్రతినిధి కొమ్మారెడ్డి పట్టాభిరామ్ పై దాడి ఘటనతో టీడీపీ నాయకత్వం తీవ్ర ఆగ్రహంతో ఉంది.
