Bandi Sanjay: టీఆర్ఎస్, ఎంఐఎం కలిసి భాగ్యనగరాన్ని దోచే కుట్ర చేస్తున్నాయి: బండి సంజయ్
- జీహెచ్ఎంసీ మేయర్ గా టీఆర్ఎస్ అభ్యర్థి ఎన్నిక
- టీఆర్ఎస్ కు మద్దతుగా నిలిచిన ఎంఐఎం
- ఆగ్రహంతో స్పందించిన బండి సంజయ్
- ఆ రెండు పార్టీలది అక్రమ సంబంధం అంటూ వ్యాఖ్యలు
- పైసా అవినీతి జరిగినా బజారుకీడ్చుతామని హెచ్చరిక
జీహెచ్ఎంసీ మేయర్ ఎన్నికలో ఎంఐఎం మద్దతుతో టీఆర్ఎస్ అభ్యర్థి గద్వాల విజయలక్ష్మి విజయం సాధించగా, బీజేపీ అభ్యర్థి రాధా ధీరజ్ రెడ్డికి నిరాశ ఎదురైంది. ఈ నేపథ్యంలో తెలంగాణ బీజేపీ చీఫ్ బండి సంజయ్ తీవ్రంగా స్పందించారు. టీఆర్ఎస్-ఎంఐఎం అక్రమ సంబంధం మరోసారి బట్టబయలైందని అన్నారు. జీహెచ్ఎంసీలో టీఆర్ఎస్ స్టీరింగ్ ఎంఐఎం చేతిలో ఉండడం ఖాయమని తెలిపారు. టీఆర్ఎస్, ఎంఐఎం కలిసి భాగ్యనగరాన్ని దోచుకునే కుట్రచేస్తున్నాయని సంజయ్ మండిపడ్డారు. ఒక్క పైసా అవినీతి జరిగినట్టు తెలిసినా ఈ రెండు పార్టీలను బజారుకీడ్చుతామని హెచ్చరించారు.
ఎన్నికల సమయంలో తమ మధ్య పొత్తులేదని, తాము వేర్వేరు అని చెప్పి సిగ్గులేకుండా ప్రచారం చేసుకున్నారని విమర్శించారు. నిజాయతీతో కూడిన రాజకీయం చేయాలని అనుకుంటే బహిరంగంగానే పొత్తు పెట్టుకోవాల్సిందని హితవు పలికారు. ఈ రెండు పార్టీలు కలిసి పోటీ చేయడం వల్లే టీఆర్ఎస్ కు ఆ మాత్రం స్థానాలైనా వచ్చాయని, పక్కా మతతత్వ పార్టీ ఎంఐఎంకు టీఆర్ఎస్ చెంచా అని ఇవాళ రుజువైందని అన్నారు.
