Sopore: సోపోర్ లో బీజేపీ నేతను హత్య చేసింది లష్కరే తోయిబా ఉగ్రవాదులే!
- మునిసిపల్ కౌన్సిల్ సమావేశంపై దాడి
- బులెట్ గాయాలతో ఇద్దరి మృతి
- ఉగ్రవాదుల కోసం గాలింపు
జమ్మూ కశ్మీర్ పరిధిలోని సోపోర్ మునిసిపల్ కౌన్సిల్ సమావేశం జరుగుతున్న వేళ, లష్కరే తోయిబా ఉగ్రవాదులు దాడి చేసి, బీజేపీ నేత, కౌన్సిలర్ ను, మరో సెక్యూరిటీ గార్డును హత్య చేశారు. ఈ ఘటనలో మరో కౌన్సిలర్ కు తీవ్రగాయాలు అయ్యాయి. ఉగ్రవాదులు ఆయుధాలతో దాడి చేశారని వెల్లడించిన ఓ ఉన్నతాధికారి, ఈ దాడిలో నింగ్లీ కౌన్సిలర్ రియాజ్ అహ్మద్ పీర్, ఎస్పీఓ షఫాఖత్ నాజిర్ ఖాన్ లకు బులెట్లు తగిలి తీవ్ర గాయాలు అయ్యాయని, వారిని ఆసుపత్రికి తరలించేలోపే ప్రాణాలు పోయాయని అన్నారు.
ఈ దాడిని మాజీ ముఖ్యమంత్రి ఒమర్ అబ్దుల్లా సహా పలు రాజకీయ పార్టీల నేతలు ఖండించారు. మృతులకు సంతాపం తెలుపుతున్నట్టు అబ్దుల్లా ట్వీట్ చేశారు. గాయపడిన వారు త్వరగా కోలుకోవాలని ఆశిస్తున్నానని అన్నారు. శ్రీనగర్ మేయర్ జునైద్ ఆజిమ్ మట్టు ఈ దాడిని తీవ్రంగా ఖండించారు.
దాడి జరిగిన ప్రాంతాన్ని సందర్శించిన కాశ్మీర్ జోన్ఐజీ విజయ్ కుమార్, దాడికి పాల్పడిన వారు స్థానిక ఎల్ఈటీ టెర్రరిస్టులని గుర్తించామని అన్నారు. ఈ ఘటన వెనుక ముదాసిర్ పండిట్ సూత్రధారని, మరో విదేశీ మిలిటెంట్ కూడా ఉన్నాడని, వారిని పట్టుకునేందుకు ప్రత్యేక బృందాలను ఏర్పాటు చేశామని అన్నారు. రెండు ప్రాంతాల్లో కార్డన్ సెర్చ్ ప్రారంభించామని తెలిపారు. ఈ దాడి జరిగిన ప్రాంతంలో అక్కడే ఉండి, సమయానికి ఉగ్రవాదులను అడ్డుకోలేకపోయిన నలుగురు అధికారులను సస్పెండ్ చేసినట్టు విజయ్ కుమార్ తెలియజేశారు.
