Raviteja: మారుతి దర్శకత్వంలో రవితేజ సినిమా ఖాయమే!

రవితేజ జోరు మామూలుగా లేదు .. వరుస ప్రాజెక్టులకు గ్రీన్ సిగ్నల్ ఇస్తూ వెళుతున్నాడు. ఇటీవల వచ్చిన 'క్రాక్' హిట్ తో ఆయన తన దూకుడును మరింత పెంచాడు. ప్రస్తుతం రమేశ్ వర్మ దర్శకత్వంలో ఆయన 'ఖిలాడి' సినిమా చేస్తున్నాడు. ఇప్పటికే ఈ సినిమా కొంతవరకూ షూటింగు జరుపుకుంది.

ఆ తరువాత చేసే ప్రాజెక్టును కూడా రవితేజ లైన్లో పెట్టేశాడు. త్రినాథరావు నక్కిన దర్శకత్వంలో ఈ సినిమా ఉండనుంది. యూత్ ను .. మాస్ ను దృష్టిలో పెట్టుకుని ఈ కథ నడవనుందని తెలుస్తోంది. ప్రస్తుతం త్రినాథరావు ఈ ప్రాజెక్టు పనిలోనే బిజీగా ఉన్నాడు.

ఇక ఆ తరువాత సినిమాను మారుతి దర్శకత్వంలో రవితేజ చేయనున్నట్టు తెలుస్తోంది. ఇంతకుముందే మారుతి .. రవితేజకు ఒక కథను వినిపించడం .. ఆ కథకు రవితేజ ఓకే చెప్పడం జరిగిపోయాయి. అయితే బడ్జెట్ విషయం.. పారితోషికం విషయం కారణంగా ఆ ప్రాజక్టు ముందుకు వెళ్లలేదు.

దాంతో మారుతి ఇప్పుడు వేరే నిర్మాతను ఎంటర్ చేశాడట. అందువలన ఈ ప్రాజెక్టుకు లైన్ క్లియర్ అయింది. అందువలన రవితేజ - మారుతి కాంబినేషన్ దాదాపు సెట్ అయినట్టే. ప్రస్తుతం గోపీచంద్ తో 'పక్కా కమర్షియల్' సినిమా చేస్తున్న మారుతి, ఆ తరువాత ప్రాజెక్టుగా రవితేజ సినిమాను పట్టాలెక్కించనున్నాడు.