Somu Veerraju: ఓ మహిళ ఆవేదనను వీడియో రూపంలో పంచుకున్న సోము వీర్రాజు
- జగన్ పాలనకు ఇదే నిదర్శనమన్న సోము వీర్రాజు
- ఇల్లు, రేషన్ కార్డు అడిగితే బెదిరిస్తున్నారన్న మహిళ
- రికార్డుల్లో చనిపోయినట్టు చూపిస్తున్నారని వెల్లడి
- గట్టిగా నిలదీస్తే కొట్టడానికి వస్తున్నారని ఆరోపణ
నెల్లూరు జిల్లా సర్వేపల్లి నియోజకవర్గానికి చెందిన ఓ మహిళ ఆవేదనను ఏపీ బీజేపీ చీఫ్ సోము వీర్రాజు వీడియో రూపంలో పంచుకున్నారు. జగన్ పాలనలో పేదల దుస్థితికి ఇదే నిదర్శనమని విమర్శించారు. ఉండడానికి ఇల్లు, రేషన్ కార్డు అడిగితే బెదిరిస్తున్నారని... పంచాయతీ కార్యదర్శిని గట్టిగా నిలదీస్తే రికార్డుల్లో చనిపోయినట్టు చూపిస్తున్నాడని ఆ వీడియోలో ఒక మహిళ విలపిస్తూ చెప్పడాన్ని చూడొచ్చు.
కాగా, తానే కాకుండా పిల్లాపాపలున్న అనేక మంది మహిళల పరిస్థితి ఇలాగే ఉందని ఆ మహిళ వాపోయింది. ప్రభుత్వ పథకాలపై ప్రశ్నిస్తే ఏం చేస్తావని బెదిరిస్తూ పైపైకి వస్తున్నారని ఆమె ఆవేదన వ్యక్తం చేసింది. వీఆర్వోలు, పంచాయతీ కార్యదర్శులందరిదీ ఇదే తీరని వెల్లడించింది.
