Krishnavamshi: ఎన్టీఆర్ తో కృష్ణవంశీ 'రైతు'?
- గతంలో బాలకృష్ణ విన్న కథ
- అప్పట్లో పట్టాలెక్కని ప్రాజెక్టు
- ఎన్టీఆర్ తో చేసే ఉద్దేశంలో కృష్ణవంశీ
- వరుస ప్రాజెక్టులతో బిజీగా ఎన్టీఆర్
కృష్ణవంశీ .. ఎన్టీఆర్ తో ఒక సినిమా చేయడానికి గట్టి ప్రయత్నాలే చేస్తున్నాడనే టాక్ ఇప్పుడు జోరుగా షికారు చేస్తోంది. గ్రామీణ నేపథ్యంలో వ్యవసాయం .. రైతుల సమస్యలు ... వాళ్లు పడుతున్న ఇబ్బందుల చుట్టూ ఈ కథ తిరుగుతుంది. రైతుల సమస్యలకు పరిష్కారం చూపడం కూడా జరుగుతుంది.
బాలకృష్ణ తన 100వ సినిమాకిగాను మంచి కథ కోసం వెయిట్ చేస్తున్నప్పుడు కృష్ణవంశీ 'రైతు' అనే ఒక కథను వినిపించాడు. వినోదంతో పాటు సందేశం కూడా కలిగిన కథ కావడం వలన, బాలకృష్ణ ఈ సినిమా చేస్తాడని అనుకున్నారుగానీ అలా జరగలేదు. ఇప్పుడు ఆ కథను ఎన్టీఆర్ తో చేయాలనే పట్టుదలతో కృష్ణవంశీ ఉన్నాడని చెప్పుకుంటున్నారు.
అయితే ప్రస్తుతం 'ఆర్ ఆర్ ఆర్' షూటింగులో ఉన్న ఎన్టీఆర్, ఆ తరువాత కొరటాల సినిమా చేయనున్నాడు. ఆ సినిమా పూర్తయిన తరువాత ప్రశాంత్ నీల్ ప్రాజెక్టుపైకి వెళ్లనున్నాడు. ఈ సినిమా తరువాత ఇంతకుముందు త్రివిక్రమ్ తో అనుకున్న కథ పట్టాలెక్కనుంది. అంటే .. ఒకవేళ ఎన్టీఆర్ ఓకే అన్నప్పటికీ, అది కార్యరూపం దాల్చడానికి చాలాకాలమే పడుతుందన్న మాట.