Taliban: మాటలను బట్టి కాకుండా.. చేతలను బట్టి తాలిబన్లపై అంచనాకు రావాలి: యూకే ప్రధాని బోరిస్ జాన్సన్
- ఆఫ్ఘన్ ప్రజలకు క్షమాభిక్ష పెట్టిన తాలిబన్లు
- కొత్త ప్రభుత్వం పాతదానిలా ఉండబోదంటూ ప్రకటన
- తాము సమర్థవంతంగా స్పందించామన్న బోరిస్
- రెండువేల మందికి పైగా ఆఫ్ఘన్లను విదేశాలకు తరలించామన్న బ్రిటన్ పీఎం
ఆఫ్ఘనిస్థాన్‌ను హస్తగతం చేసుకున్న తాలిబన్లు.. తాము గతంలోలా కాకుండా కొత్త విధానంలో పరిపాలన సాగిస్తామని ప్రకటించిన సంగతి తెలిసిందే. మహిళల హక్కులను కూడా గౌరవిస్తామని, ఏ దేశంతోనూ తాము శత్రుత్వం కోరుకోవడం లేదని తాలిబన్లు ప్రకటించారు.
ఈ క్రమంలో ఇంగ్లండ్ ప్రధాని బోరిస్ జాన్సన్ కీలక వ్యాఖ్యలు చేశారు. తాలిబన్లను వారి మాటలను బట్టి కాకుండా, వారి చేతలను బట్టి అంచనా వేయాలని ఆయన అన్నారు. దేశంలోని ప్రజలందరికీ క్షమాభిక్ష పెట్టామని తాలిబన్లు ప్రకటించిన నేపథ్యంలోనే బోరిస్ జాన్సన్ ఈ వ్యాఖ్యలు చేసినట్లు తెలుస్తోంది. తాలిబన్ వశమైన ఆఫ్ఘనిస్థాన్ నుంచి రెండువేల మందికి పైగా ఆఫ్ఘన్లను విదేశాలకు తరలించేందుకు బ్రిటన్ సహకరించిందని ఆయన చెప్పారు.
ఆఫ్ఘనిస్థాన్‌లో తలెత్తిన క్లిష్ట పరిస్థితుల్లో బ్రిటన్ ప్రభుత్వం ఎంతో సమర్థవంతంగా స్పందించిందని జాన్సన్ అభిప్రాయపడ్డారు. ఈ క్రమంలోనే ఇప్పటి వరకు 306 మంది బ్రిటన్ పౌరుల్ని, 2 వేలమందికిపైగా ఆఫ్ఘన్ పౌరుల్ని తమ ప్రభుత్వం సురక్షితంగా విదేశాలకు తరలించిందని జాన్సన్ తెలిపారు.
ఆఫ్ఘనిస్థాన్ నుంచి బయటకు వెళ్లిపోవాలని అనుకునే వారికోసం బ్రిటన్ ప్రభుత్వం పునరావాస పథకం ప్రకటించిన సంగతి తెలిసిందే. ఈ కార్యక్రమంలో భాగంగా సుమారు 5 వేలమందికి పునరావాసం కల్పించాలని బ్రిటన్ ప్రభుత్వం లక్ష్యంగా పెట్టుకుంది. ఆఫ్ఘన్ ప్రజల డిమాండ్ల మేరకు ఈ సంఖ్యను 20 వేలకు పెంచుతున్నట్లు ప్రకటించింది.