IT Returns: ఐటీ రిటర్నుల దాఖలు గడువును పెంచిన కేంద్రం
- ఇప్పటికే ఒకసారి పొడిగింపు.. ఇది రెండోసారి
- ట్విట్టర్ వేదికగా ప్రకటించిన ఇన్‌కంట్యాక్స్ విభాగం
- గతేడాది కూడా నాలుగు సార్లు వాయిదా
ఐటీ రిటర్నులు దాఖలు చేయాల్సిన గడువును కేంద్ర ప్రభుత్వం మరోసారి పొడిగించింది. సెప్టెంబరు 30లోపు ఐటీ రిటర్నులు దాఖలు చేయాలని ఇటీవల ప్రకటించిన ప్రభుత్వం.. ఈ గడువును డిసెంబరు 31 వరకూ పొడిగిస్తూ నిర్ణయం తీసుకుంది. ఈ విషయాన్ని ట్విట్టర్ వేదికగా ఇన్‌కంట్యాక్స్ విభాగం వెల్లడించింది. ఈ మేరకు సర్కులర్ నం.17/2021ను విడుదల చేసింది.
గతంలో జులై 31లోగా ఐటీ రిటర్నులు దాఖలు చేయాలని చెప్పిన ప్రభుత్వం.. కొత్త ఐటీ ఈ-ఫైలింగ్ పోర్టల్‌లో సాంకేతిక సమస్యలు రావడం, కరోనా పరిస్థితుల దృష్ట్యా ఈ గడువును సెప్టెంబరు 30 వరకూ పొడిగించింది. ఇప్పుడు ఈ గడువును మరోసారి డిసెంబరు 31 వరకూ పొడిగిస్తున్నట్లు ప్రకటించింది. తమ ఖాతాలు ఆడిట్ చేయాల్సిన అవసరం లేని వ్యక్తులు సాధారణంగా ఐటీఆర్-1 లేక ఐటీఆర్-4 ఫారాల ద్వారా ఆదాయపు పన్ను రిటర్నులు దాఖలు చేస్తారు. వీరికోసమే ఈ గడువును పొడిగించారు.
గతేడాది కూడా ప్రభుత్వం ఇలా ఐటీ రిటర్నుల దాఖలు గడువును నాలుగు సార్లు పొడిగించింది. తొలుత జులై 31లోగా ఐటీ రిటర్నులు దాఖలు చేయాలని చెప్పిన ఆదాయపన్ను శాఖ.. ఈ తేదీని 2020 నవంబర్ 30 వరకూ పొడిగించింది. ఆ తర్వాత దాన్ని 2020 డిసెంబర్ 31కు పొడిగించి, ఆ తర్వాత మరోసారి 2021 జనవరి 10 వరకూ ఐటీ రిటర్నులు దాఖలు చేసే అవకాశం కల్పించింది.
