ICC: శునకానికి ఐసీసీ ప్రత్యేక పురస్కారం.. ఐసీసీ డాగ్ ఆఫ్ ది మంత్‌ అవార్డు!
- ఐర్లండ్‌లో మ్యాచ్ జరుగుతుండగా మైదానంలోకి
- బంతిని నోట కరచుకుని తిరుగుతూ బ్యాటర్‌కు అందజేత
- సోషల్ మీడియాలో వైరల్ అయిన వీడియో
ఐసీసీ పురస్కారం శునకానికా.. అని ఆశ్చర్యపోకండి. ఇది నిజంగా నిజమే. ఐసీసీ ప్రతినెల క్రికెటర్లకు పురస్కారాలు ప్రకటించడం పరిపాటి. అయితే, ఈసారి అందులో ఓ శునకం కూడా చోటు సంపాదించుకుంది. ఓ ప్రత్యేక పురస్కారంతో ఐసీసీ దానిని సత్కరించింది.
ఇంతకీ ఏం జరిగిందంటే.. ఐర్లండ్‌లో ఓ మ్యాచ్ జరుగుతున్న సమయంలో మైదానంలోకి దూసుకొచ్చిన ఓ శునకం బంతిని నోటితో పట్టుకుని పరుగులు తీసింది. దానిని అలా పట్టుకుని పరిగెడుతూ చివరికి బ్యాటర్ వద్దకెళ్లి ఆ బంతిని ఇచ్చింది. ఇందుకు సంబంధించిన వీడియో సోషల్ మీడియాలో విపరీతంగా వైరల్ అయింది.
దీంతో స్పందించిన ఐసీసీ.. బ్యాటర్‌కు బంతి అందించి, అందరి మనసులు చూరగొన్న ఆ శునకాన్ని ప్రత్యేక అవార్డుతో సత్కరించింది. నోటితో బంతి, తలపై టోపీతో ఉన్న శునకం ఫొటోను ఐసీసీ ఈ సందర్భంగా షేర్ చేసింది.