Mohan Babu: మన ఇంటి అమ్మాయిని చేసుకున్నాడు కాబట్టే చిరంజీవి పొజిషన్ బాగుంది: బాలకృష్ణతో మోహన్ బాబు
- బాలకృష్ణ హోస్ట్ గా అన్ స్టాపబుల్
- ఆహా ఓటీటీలో ప్రసారం
- దీపావళి సందర్భంగా తొలి ఎపిసోడ్
- సందడి చేసిన మోహన్ బాబు
ఆహా ఓటీటీలో నందమూరి బాలకృష్ణ హోస్ట్ గా అన్ స్టాపబుల్ టాక్ షో నేడు ప్రారంభమైంది. తొలి ఎపిసోడ్ లో మోహన్ బాబు సందడి చేశారు. ఈ సందర్భంగా మోహన్ బాబు తన అభిప్రాయాలు పంచుకున్నారు. మోహన్ బాబుతో బాలయ్య అన్ స్టాపబుల్ హైలైట్స్ ఇవిగో...
- చిరంజీవి గురించి వ్యక్తిగతంగా ఎలాంటి దురభిప్రాయం లేదు. అల్లు రామలింగయ్య కుమార్తె సురేఖను చిరంజీవి పెళ్లి చేసుకున్నాడు. సురేఖను నా తోబుట్టువుగానే భావిస్తాను. ఆ లెక్కన చిరంజీవి మనింటి అమ్మాయిని చేసుకున్నాడు కాబట్టే మంచి పొజిషన్ లో ఉన్నాడు. చిరంజీవితో ఎన్నో సినిమాలు చేశాను. అద్భుతమైన డ్యాన్సర్, నటుడు.
- నా కెరీర్ లో అత్యంత దారుణమైన సినిమా 'పటాలం పాండు'. ఆ సినిమా వచ్చిన తర్వాత నా భార్య నిర్మల వారం రోజులు నాతో మాట్లాడలేదు.
- ఓ దశలో వరుసగా నా సినిమాలు ఫెయిలయ్యాయి. దాంతో మహాబలిపురంలో నా స్థలాలు ఉంటే అమ్మేసి ఎవరికి ఇవ్వాల్సింది వారికి ఇచ్చేశాను. నేను ఇబ్బందుల్లో ఉంటే ఎవరూ సాయం చేయలేదు.
- చంద్రబాబు మాట విని అన్నయ్య ఎన్టీఆర్ ను వీడి బయటికి వచ్చేశా. ఆ తర్వాత రజనీకాంత్ తో కలిసి ఓసారి ఎన్టీఆర్ ను కలిస్తే ఆయనేమన్నారో తెలుసా... "మోహన్ బాబూ, నువ్వు కూడానా!" అన్నారు. ఆ మాటకు నేను సమాధానం చెప్పుకోలేకపోయాను. ఇది జరిగిన కొన్నాళ్లకే నాకు క్రమశిక్షణ లేదని చంద్రబాబు పార్టీ నుంచి బయటికి పంపించేశాడు.
- ఓసారి, 'అన్నయ్యా మీతో ఓ సినిమా చేస్తాను' అని ఎన్టీఆర్ ను అడిగాను. అందుకాయన... 'రాజకీయాల్లో విఫలమైనవాడ్ని, ఇప్పుడు నా సినిమాలు ఎవరూ చూడరు. నాతో నటించి డబ్బులు పోగొట్టుకోవద్దు' అని అన్నారు. అదీ ఎన్టీఆర్ గొప్పదనం!