IMD: ఉత్తరాంధ్రకు ఐఎండీ తాజా వర్ష సూచన
- రేపు అండమాన్ సముద్రంలో అల్పపీడనం
- వాయుగుండంగా మారుతుందని ఐఎండీ అంచనా
- పశ్చిమ వాయవ్య దిశగా పయనిస్తుందని వెల్లడి
- డిసెంబరు 3 రాత్రి నుంచి ఉత్తరాంధ్ర, ఒడిశాపై ప్రభావం
దక్షిణ అండమాన్ సముద్రంలో రేపు అల్పపీడనం ఏర్పడనుందని భారత వాతావరణ శాఖ (ఐఎండీ) వెల్లడించింది. ఇది పశ్చిమ వాయవ్య దిశగా పయనిస్తుందని, ఆగ్నేయ-తూర్పు మధ్య బంగాళాఖాతంలోకి ప్రవేశించి తదుపరి 48 గంటల్లో వాయుగుండంగా మారుతుందని తెలిపింది. దీని ప్రభావం ఉత్తరాంధ్ర, ఒడిశా తీరాలపై ఉంటుందని తెలిపింది.
డిసెంబరు 3 రాత్రి నుంచి రెండ్రోజుల పాటు ఉత్తర కోస్తా, ఒడిశాలో కొన్నిచోట్ల భారీ నుంచి అతి భారీ వర్షాలు కురిసే అవకాశం ఉందని ఐఎండీ పేర్కొంది. అదే సమయంలో దక్షిణ కోస్తా, రాయలసీమ జిల్లాల్లో తేలికపాటి నుంచి మోస్తరు వర్షాలు పడతాయని తెలిపింది.