Pakistan: ఎట్టకేలకు పాకిస్థాన్ చేరిన ‘బోర్డర్’ బాబు!
- అట్టారి-వాఘా సరిహద్దులో చిక్కుకుపోయిన పాకిస్థానీలు
- సరిహద్దు వద్ద జన్మించిన బిడ్డకు ‘బోర్డర్’ అని నామకరణం చేసిన దంపతులు
- ఎన్జీవో సహకారంతో ఎట్టకేలకు స్వదేశానికి
ఈ నెల 2న భారత్-పాకిస్థాన్ సరిహద్దులో జన్మించిన ‘బోర్డర్’ ఎట్టకేలకు సురక్షితంగా పాకిస్థాన్ చేరాడు. లాక్‌డౌన్‌కు ముందు కొందరు పాకిస్థానీలు భారత్ సందర్శనకు వచ్చారు. కరోనా సెకండ్ వేవ్ ఆంక్షల కారణంగా తిరిగి స్వదేశం పాకిస్థాన్ వెళ్లలేకపోయారు. ఆ తర్వాత ఆంక్షలు సడలించడంతో పాక్ వెళ్లేందుకు ప్రయత్నించగా, అవసరమైన పత్రాలు లేకపోవడంతో అట్టారి-వాఘా సరిహద్దు వద్ద పాక్ రేంజర్లు వారిని అనుమతించలేదు. దీంతో దాదాపు 80 రోజులపాటు అక్కడే చిక్కుకుపోయారు. మొత్తం 98 మంది పాకిస్థానీలు అక్కడి టెంట్లలోనే గడిపారు.
వీరిలో పంజాబ్ ప్రావిన్స్‌లోని రాజన్‌పూర్ జిల్లాకు చెందిన నింబోదేవి-బలమ్‌రామ్ దంపతులు కూడా ఉన్నారు. అప్పటికే నిండు గర్భిణి అయిన నింబోదేవి ఈ నెల 2న సరిహద్దులో స్థానిక ప్రజల సహకారంతో పండంటి మగబిడ్డకు జన్మనిచ్చింది. దీంతో ఆ బిడ్డకు వారు ‘బోర్డర్’ అని నామకరణం చేశారు.
మరోవైపు, సరిహద్దులో పాక్ ప్రజలు కొన్ని రోజులుగా చిక్కుకుపోయిన విషయం తెలుసుకున్న ఓ ఎన్జీవో వారికి అవసరమైన వీసాలు, ఇతర ధ్రువీకరణ పత్రాలు సమకూర్చింది. దీంతో వారంతా తిరిగి స్వదేశమైన పాకిస్థాన్ చేరుకోగలిగారు. అలా ‘బోర్డర్’ సురక్షితంగా ఇంటికి చేరుకోగలిగాడు.