Khukri Dance: మంచు కొండల్లో భారత సైనికుల ఖుక్రీ డ్యాన్స్... వీడియో ఇదిగో!
- ఉత్తర కశ్మీర్ లో విపరీతంగా మంచు
- క్లిష్ట పరిస్థితుల్లో విధులు నిర్వర్తిస్తున్న జవాన్లు
- కుప్వారా జిల్లాలో ఖుక్రీ విన్యాసాలు ప్రదర్శించిన వైనం
- వీడియో పంచుకున్న భారత ఆర్మీ
భారతదేశం ఎంత విశాలమైనదో తెలిసిందే. ఇంత పెద్ద దేశం, అందులోని ప్రజలు భద్రంగా ఉన్నారంటే అందుకు కారణం సైనికులే. శత్రు సైనికుల కంటే ప్రమాదకరమైన వాతావరణ పరిస్థితులను ఎదుర్కొంటూ, కుటుంబాలకు దూరంగా వుంటూ విధులు నిర్వర్తించే ఆ వీర సైనికులు నిజంగా త్యాగధనులే. ప్రస్తుతం దేశంలో చలికాలం కావడంతో ఉత్తర కశ్మీర్ లో ఎక్కడికక్కడ మంచు పేరుకుపోతోంది. ఇలాంటి పరిస్థితుల్లోనూ కుప్వారా జిల్లాలో సైనికులు విధులు నిర్వర్తిస్తున్నారు.
తాజాగా, భారత సైన్యానికి చెందిన ఓ బృందం త్రివర్ణ పతాకం ముంగిట ప్రదర్శించిన ఖుక్రీ డ్యాన్స్ వీడియో సామాజిక మాధ్యమాల్లో ఆకట్టుకుంటోంది. ఖుక్రీ అనేది ఓ వంపు తిరిగిన కత్తి. గూర్ఖా రెజిమెంట్ లో ఉండే సైనికులు తుపాకీతో పాటు దీన్ని కూడా ధరిస్తుంటారు. కాగా, సంగీతానికి అనుగుణంగా జవాన్లు ప్రదర్శించిన ఖుక్రీ విన్యాసాల వీడియోను భారత సైన్యం పంచుకుంది.
