Lioness: జూ సంరక్షకుడ్ని చంపి మగ సింహంతో కలిసి పారిపోయిన ఆడ సింహం
- టెహరాన్ లో ఘటన
- సింహాలకు ఆహారం అందించేందుకు వెళ్లిన సంరక్షకుడు
- ఒక్కసారిగా దాడి చేసిన ఆడ సింహం
ఇరాన్ రాజధాని టెహరాన్ లో ఓ ఆడ సింహం జూలో సంరక్షకుడ్ని బలిగొంది. ఈ ఘటనపై జూ వర్గాలు మీడియాకు తెలిపాయి. ఆ ఆడ సింహం అనేక సంవత్సరాలుగా టెహరాన్ జూలో ఉంది. 40 ఏళ్ల వయసున్న జూ సంరక్షుకుడు ఒకరు సింహం ఉన్న ఎన్ క్లోజర్ లోకి ప్రవేశించాడు. దాంతో ఒక్కసారిగా అతడిపై ఆడ సింహం దాడి చేసింది. తీవ్రగాయాలపాలైన ఆ ఉద్యోగి మరణించాడు.
ఎన్ క్లోజర్ తలుపులు తెరిచి ఉంచడంతో ఆ ఆడ సింహం మరో మగ సింహంతో కలిసి తప్పించుకుని పారిపోయింది. దాంతో జూలో భయాందోళనలు నెలకొన్నాయి. భద్రతా బలగాలు వెంటనే జూని తమ అధీనంలోకి తీసుకున్నాయి. జూ అధికారులు వెంటనే స్పందించి తప్పించుకున్న సింహాల కోసం గాలింపు చర్యలు చేపట్టారు. ఎట్టకేలకు ఆ రెండు సింహాలను బంధించి ఎన్ క్లోజర్ లోకి తరలించారు.