Nara Lokesh: ఇది జ‌గ‌న్ ఉగాది బాదుడు.. ఏపీలో విద్యుత్ చార్జీల పెంపుపై లోకేశ్ విసుర్లు!
- విద్యుత్ చార్జీల పెంపుపై లోకేశ్ ఆగ్ర‌హం
- బాదుడే బాదుడు.. వీర‌బాదుడంటూ కామెంట్‌
- ట్విట్ట‌ర్ వేదిక‌గా విమర్శలతో కూడిన పోస్ట్
ఏపీలో మ‌రోమారు విద్యుత్ చార్జీల‌పై విప‌క్షాలు విరుచుకుప‌డుతున్నాయి. ఇప్ప‌టికే ఆరు సార్లు విద్యుత్ చార్జీల‌ను పెంచిన జ‌గ‌న్ స‌ర్కారు.. మ‌రోమారు విద్యుత్ చార్జీల‌ను పెంచింద‌ని ఆయా పార్టీల నేత‌లు ధ్వ‌జ‌మెత్తుతున్నారు. ఈ క్ర‌మంలో టీడీపీ జాతీయ ప్ర‌ధాన కార్య‌ద‌ర్శి నారా లోకేశ్ కూడా జ‌గ‌న్ స‌ర్కారు పెంచిన విద్యుత్ చార్జీల‌పై సెటైర్లు సంధించారు.
ట్విట్ట‌ర్ వేదిక‌గా ఓ పోస్ట్ పెట్టిన నారా లోకేశ్.. తాజా విద్యుత్ చార్జీల పెంపును జ‌గ‌న్ ఉగాది బాదుడుగా అభివ‌ర్ణించారు. విద్యుత్ చార్జీల పెంపుతో జ‌గ‌న్‌కే షాక్ కొట్టిన‌ట్టుగా ఉన్న ఓ ఫొటోను త‌న పోస్ట్‌కు ఆయ‌న యాడ్ చేశారు. ఇప్ప‌టికే పెట్రోల్ ఏపీలోనే అత్య‌ధిక‌మ‌న్న విష‌యాన్ని కూడా ప్ర‌స్తావించిన లోకేశ్.. జ‌నంపై మ‌రో భారం వేస్తూ జ‌గ‌న్ స‌ర్కారు విద్యుత్ చార్జీల‌ను పెంచింద‌ని ఆగ్ర‌హం వ్య‌క్తం చేశారు. ఓ ప‌క్క పెట్రోల్, డీజిల్ ధ‌ర‌లు.. మ‌రో ప‌క్క విద్యుత్ చార్జీలు..బాదుడే బాదుడు.. వీర బాదుడు అంటూ లోకేశ్ సెటైరిక్ వ్యాఖ్య‌లు సంధించారు.