Vista Dome: సికింద్రాబాద్-పూణే శతాబ్ది ఎక్స్ ప్రెస్ రైలులో విస్టా డోమ్ బోగీ ఏర్పాటు... చార్జీ రూ.2,110
- సికింద్రాబాద్- పూణే శతాబ్ది ఎక్స్ ప్రెస్ పునరుద్ధరణ
- ఈ నెల 10 నుంచి రాకపోకలు
- విస్టా డోమ్ రూపంలో రైలుకు అదనపు హంగు
- విస్టా డోమ్ బోగీకి ప్రయాణికుల ఆదరణ
కరోనా మహమ్మారి సృష్టించిన విలయం నుంచి కోలుకున్న భారత్ లో సాధారణ పరిస్థితులు నెలకొంటున్నాయి. కరోనా సంక్షోభ సమయంలో రద్దు చేసిన రైళ్లను రైల్వే శాఖ క్రమంగా పునరుద్ధరిస్తోంది. తాజాగా నెంబరు 12026/12025 సికింద్రాబాద్-పూణే-సికింద్రాబాద్ శతాబ్ది ఎక్స్ ప్రెస్ రైలును ఈ నెల 10వ తేదీ నుంచి ఇరువైపులా పునరుద్ధరించారు. కాగా, ఈ ఎక్స్ ప్రెస్ రైలుకు అదనపు హంగును జోడించారు. ప్రకృతి అందాలను వీక్షిస్తూ ప్రయాణించే వారి కోసం కొత్తగా విస్టా డోమ్ బోగీని ఏర్పాటు చేశారు.
దక్షిణ మధ్య రైల్వే పరిధిలో విస్టా డోమ్ ను కలిగివున్న మొదటి రైలు సికింద్రాబాద్-పూణే శతాబ్ది ఎక్స్ ప్రెస్. ఈ విస్టా డోమ్ బోగీలో ప్రయాణానికి సికింద్రాబాద్ నుంచి పూణేకి ఒక్కొక్కరికి చార్జీ రూ.2,110 గా నిర్ణయించారు. విస్టా డోమ్ బోగీకి ప్రయాణికుల నుంచి ఆదరణ లభిస్తోందని రైల్వే వర్గాలు పేర్కొన్నాయి.
ఈ శతాబ్ది ఎక్స్ ప్రెస్ రైలు సికింద్రాబాద్ లో మధ్యాహ్నం 2.45 గంటలకు బయల్దేరి రాత్రి 11.10 గంటలకు పూణే చేరుకుంటుంది. అటు పూణేలో ఉదయం 6 గంటలకు బయల్దేరి మధ్యాహ్నం 2.20 గంటలకు సికింద్రాబాద్ చేరుకుంటుంది. మంగళవారం మినహా వారంలో అన్ని రోజులు ఈ రైలు నడుస్తుంది.
