Andhra Pradesh: 'జగన్ రోడ్లు- నరకానికి దారులు'.. ఏపీ రోడ్ల‌పై బీజేపీ ప్ర‌చారం షురూ
- ఏపీలో రోడ్ల దుస్థితిపై టీడీపీ, జ‌న‌సేన ప్ర‌చారం
- తాజాగా ఆ బాధ్య‌త‌ను తీసుకున్న బీజేపీ
- సోష‌ల్ మీడియా వేదికగా కార్టూన్లతో ప్ర‌చారం మొద‌లెట్టిన క‌మ‌ల‌నాథులు
ఏపీలో ర‌హ‌దారుల దుస్థితిపై ఇప్ప‌టికే ప్ర‌ధాన ప్ర‌తిప‌క్షం టీడీపీతో పాటు జ‌న‌సేన కూడా వినూత్న నిర‌స‌న‌ల‌కు దిగిన సంగతి తెలిసిందే. ఇటీవలే ప్రారంభ‌మైన జ‌న‌సేన ప్ర‌చారం ఇంకా కొన‌సాగుతుండ‌గా... ఏపీలో ఆ పార్టీతో పొత్తులో కొనసాగుతున్న బీజేపీ కూడా తాజాగా రోడ్ల దుస్థితిపై ప్ర‌చారం మొద‌లుపెట్టింది. జ‌న‌సేన మాదిరే కార్టూన్లతో బీజేపీ త‌న ప్ర‌చారానికి శ్రీకారం చుట్టింది.
శుక్ర‌వారం సోష‌ల్ మీడియా వేదికగా బీజేపీ ఓ సెటైరిక‌ల్ కార్టూన్‌ను సంధించింది. 'జగన్ రోడ్లు- నరకానికి దారులు' పేరిట మొద‌లుపెట్టిన ఈ ప్ర‌చారంలో భాగంగా 'వైసీపీ ప్ర‌భుత్వ సిత్రాలు... రాష్ట్ర రోడ్లు' అంటూ ఓ కార్టూన్‌ను పోస్ట్ చేసింది. ఈ కార్టూన్‌ లో విజ‌య‌వాడ‌కు 5 కిలో మీట‌ర్ల దూరంలో కారులో వెళుతున్న ఓ వ్య‌క్తి.. రోడ్డు ప‌క్క‌గా కూర్చుని మద్యం తాగుతున్న ఓ వ్య‌క్తిని 'ఈ రోడ్డు ఎక్క‌డికి వెళుతుంది' అని ప్ర‌శ్నిస్తాడు. ఆ ప్ర‌శ్న‌కు ఏమాత్రం త‌డుముకోకుండా... 'ఏముంది? డైరెక్ట్‌గా పైకే' అంటూ స‌మాధానం ఇస్తాడు. అంతేకాకుండా 'ఈ రోడ్డు ఎక్క‌డికి పోతుందో తెలియ‌దు గానీ... నీ కారేమో షెడ్డుకు, నువ్వేమో హాస్పిట‌ల్‌కి మాత్రం ప‌క్కాగా వెళ‌తారు' అంటూ సెటైర్ సంధిస్తాడు.
