Tollywood: అనూష శెట్టితో ఘనంగా హీరో నాగశౌర్య పెళ్లి వేడుక
- అనూష శెట్టిని పెళ్లాడిన యువ హీరో
- బెంగళూరులోని ఫైవ్ స్టార్ హోటల్లో వేడుక
- కుటుంబ సభ్యులు, కొద్ది మంది సన్నిహితులకే ఆహ్వానం
టాలీవుడ్ యువ హీరో నాగశౌర్య ఓ ఇంటివాడయ్యాడు. ఇంటీరియర్‌ డిజైనర్‌ అనూష శెట్టి మెడలో మూడు ముళ్లు వేశాడు. బెంగళూరులోని జేడబ్ల్యూ మారియట్ హోటల్లో ఈ ఇద్దరి పెళ్లి వేడుక ఆదివారం ఘనంగా జరిగింది. వీరి వివాహానికి ఇరు కుటుంబ పెద్దలు, సన్నిహితులు హాజరయ్యారు. ఈ పెళ్లి వేడుకకు సంబంధించిన వీడియోలను పలువురు సోషల్ మీడియాలో షేర్ చేశారు. టాలీవుడ్ ప్రముఖులు, నెటిజన్లు నూతన వధూవరులకు అభినందనలు చెబుతున్నారు. అంతకుముందు శనివారం రాత్రి యువ దంపతులు ప్రీ వెడ్డింగ్ కార్యక్రమంలో పాల్గొన్నారు. ఈ వేడుకలో నాగశౌర్య .. అనూష వేలికి ఉంగరం తొడిగాడు. కుటుంబసభ్యులు, సన్నిహితుల సమక్షంలో జరిగిన ఈ వేడుకలకు సంబంధించిన ఫొటోలు సైతం ఇప్పుడు నెట్ లో వైరల్ అయ్యాయి.