Chennai: విమానాశ్రయంలో షాకింగ్ సీన్.. మహిళ లగేజీలో 22 పాములు
- శుక్రవారం చెన్నై ఎయిర్‌పోర్టులో వెలుగు చూసిన ఘటన
- ప్రయాణికురాలి లగేజీ చెక్ చేస్తే బయటపడ్డ 22 పాములు, ఓ ఊసరవెల్లి
- మలేషియా నుంచి చెన్నైకి వచ్చిన మహిళ
- నిందితురాలిపై వన్యప్రాణుల సంరక్షణ చట్టం కింద కేసు, అరెస్ట్
చెన్నై విమానాశ్రయంలో శుక్రవారం షాకింగ్ దృశ్యం ఆవిష్కృతమైంది. తన లగేజీలో పాములు, బల్లులు తరలిస్తూ ఓ మహిళ కస్టమ్స్ అధికారులకు చిక్కింది. ఆమె మలేషియా నుంచి చెన్నైకి వచ్చినట్టు అధికారులు తెలిపారు. నిందితురాలి లగేజీలో ఏకంగా 22 పాములు, ఓ ఊసరవెల్లి ఉన్నట్టు గుర్తించారు.
ఆమె వాటిని ప్లాస్టిక్ డబ్బాల్లో పెట్టి తీసుకొచ్చింది. లగేజీలోంచి ఒక్కసారిగా బయటపడ్డ పాములను ఎయిర్‌పోర్టు సిబ్బంది జాగ్రత్తగా పట్టి బంధించారు. మహిళను అదుపులోకి తీసుకున్న అధికారులు ఆమెపై వన్యప్రాణుల సంరక్షణ చట్టం కింద కేసు నమోదు చేశారు.