Tamilnadu: స్టీరింగ్ ను ముద్దాడి, బస్సును కౌగిలించుకుని.. నెటిజన్లను కదిలిస్తున్న డ్రైవర్ భావోద్వేగం.. వీడియో ఇదిగో!
- పదవీ విరమణ రోజు కన్నీటి పర్యంతమైన ఉద్యోగి
- ఫుట్ బోర్డుకు దండం పెట్టిన తమిళనాడు డ్రైవర్
- సోషల్ మీడియాలో వైరల్ గా మారిన వీడియో
తమిళనాడు రాష్ట్ర రవాణా సంస్థకు చెందిన ఓ డ్రైవర్ పదవీ విరమణకు సంబంధించిన వీడియో ప్రస్తుతం సోషల్ మీడియాలో వైరల్ గా మారింది. చివరిసారిగా బస్సును చూసుకుంటూ కన్నీరు పెడుతున్న ఆ డ్రైవర్ భావోద్వేగం అందరి మనసులను కదిలిస్తోంది. డ్రైవర్ ముత్తుపండి రిటైర్మెంట్ రోజు స్టీరింగ్ ను ముద్దాడి, క్లచ్, గేర్, బ్రేక్.. ఇలా అన్నింటినీ తడుముతూ, నమస్కరిస్తూ బస్సులోంచి కిందికి దిగారు. ఫుట్ బోర్డుకు నమస్కరించి, బస్సు ముందుకు వచ్చారు.
సంవత్సరాల తరబడి బస్సుతో తనకున్న అనుబంధాన్ని గుర్తుచేసుకుంటూ కన్నీటితో బస్సును హగ్ చేసుకున్నారు. నేటితో తమ బంధానికి ముగింపు పలకాల్సిన సమయం వచ్చిందని భావోద్వేగానికి గురయ్యారు. ఇదంతా తోటి ఉద్యోగులు వీడియో తీసి సోషల్ మీడియాలో పెట్టడంతో అది కాస్తా వైరల్ గా మారింది.