Sajjala Ramakrishna Reddy: ఏసీ ఏర్పాటు చేయాలా... జైలులో మిగతా ఖైదీలు మనుషులు కాదా?: సజ్జల
- చంద్రబాబు ఆరోగ్యంపై టీడీపీ నేతల ఆందోళన
- వీళ్లు ఎలాగైనా మాట్లాడగలరన్న సజ్జల
- చర్మవ్యాధిని కూడా ప్రాణాంతకం చేస్తున్నారని విమర్శలు
- జైల్లో చంద్రబాబు హుందాగా ఉండడం అలవర్చుకోవాలని హితవు
- చౌతాలా ఇప్పటికీ జైల్లోనే ఉన్నారని వెల్లడి
టీడీపీ అధినేత చంద్రబాబు ఆరోగ్య పరిస్థితిపై బయట తప్పుడు ప్రచారం చేస్తున్నారని ఏపీ ప్రభుత్వ సలహాదారు సజ్జల రామకృష్ణారెడ్డి మండిపడ్డారు. జైలులో ఏసీ ఏర్పాటు చేయడానికి అదేమైనా అత్తగారి ఇల్లా? అని ఆగ్రహం వ్యక్తం చేశారు. ఈనాడు, జ్యోతి రాతలు, వాళ్ల టీవీలు చూస్తే ఇష్టం వచ్చినట్టు ప్రచారం చేస్తున్నారని విమర్శించారు.
లాలూ ప్రసాద్ యాదవ్ కు రెండు కిడ్నీలు దెబ్బతిన్నాయి కాబట్టి ఆయన బయట ఉన్నారని, చౌతాలా ఇప్పటికీ జైల్లోనే ఉన్నారని, గతంలో హర్యానాకు సీఎంగా పనిచేసిన చౌతాలాకు కూడా వయసు 70 ఏళ్లు పైనే ఉంటుందని తెలిపారు. జైళ్లలో ఉండే ఇతర ఖైదీలకు కూడా అనారోగ్య సమస్యలు ఉంటాయని సజ్జల అన్నారు.
"ప్రపంచంలో ఎక్కడా లేని విధంగా ఒక్క చంద్రబాబుకు, ఆయన కుటుంబ సభ్యులకే జైళ్లలో ప్రత్యేక హక్కులు కల్పించాలనేంతగా దబాయిస్తున్నారు. ఎక్కడ్నించి వచ్చింది వీళ్లకు ఇంత ధీమా? కేవలం ఈనాడు, జ్యోతి, ఈటీవీ, ఏబీఎన్ మాత్రమే చూస్తే... చంద్రబాబు ఇప్పుడో, ఇంకో గంటలోనే పోయేట్టున్నారనుకునే ప్రమాదం ఉంది. చర్మవ్యాధిని కూడా ప్రాణాంతకం చేస్తున్నారు.
జైలులోని సిబ్బంది, ఖైదీలు అందరూ ఆయనను రాచిరంపాన పెడుతున్నారని... మొన్న ఎవడో పైత్యం ఎక్కువైన వాడొకడు దోమల్లో విషం ఎక్కించి పంపుతున్నారని అన్నాడు.... ఈ విధంగా ఏదైనా ప్రచారం చేస్తారు. ఇదొక రాజకీయ పార్టీయేనా... రాజకీయ నేతలనే సంగతి వదిలేయండి... బాధ్యతగల వ్యక్తులుగా సమాజంలో ఉండదగిన వాళ్లేనా వీళ్లు? స్కాం సంగతి మాట్లాడకుండా ఇతర విషయాల గురించి రాద్ధాంతం చేస్తున్నారు.
చంద్రబాబు జైలులో ఉన్నారు... జైలులో వేలమంది ఖైదీలు ఉంటారు. ఏ విధంగా ఈయన ప్రత్యేకమైన వ్యక్తి? ఖైదీల్లో ఎవరైనా గ్రాడ్యుయేట్లు ఉంటే వారికి సంబంధించిన ఏర్పాట్లు ఏవో ఉంటాయి, రాజకీయ నేతలు ఖైదీలుగా ఉంటే వారికి సంబంధించిన ఏర్పాట్లు ఏవో ఉంటాయి, దాంతో పాటు మిగతా ఖైదీలదరికీ వర్తించేవి వీళ్లకు కూడా వర్తిస్తాయి. ఒకవేళ భద్రతా పరమైన ఆందోళనలు ఉంటే అందుకు తగిన భద్రతా ఏర్పాట్లు ఉంటాయి. ఇది చంద్రబాబుకైనా ఒకటే, మిగతా వారికైనా ఒకటే.
జైల్లో ఉండే మిగతా ఖైదీలు మనుషులు కాదా? రాజమండ్రిలో ఉక్కపోత నెలకొంటే అందరికీ ఇబ్బందే. మిగతా ఖైదీలు తక్కువ దుస్తులు ధరిస్తారేమో, చంద్రబాబు ఏ కారణం చేతనో వేసుకున్న చొక్కా విప్పడు, పూర్తిగా దుస్తులు ధరించి ఉంటాడు కాబట్టి ఉక్కపోత మరింత తీవ్రంగా అనిపించి ఉండొచ్చు.
కోర్టు చెప్పకముందే ప్రభుత్వ ఆదేశాలతో జైలులో చంద్రబాబుకు ఉన్నంతలో అత్యుత్తమ సౌకర్యాలు కల్పించడం జరిగింది. అసలు, బ్యారక్ మొత్తం ఖాళీ చేయాల్సిన అవసరం ఏముంది? స్నేహా బ్యారక్ ను పూర్తిగా చంద్రబాబు కోసమే కేటాయించారు. 24 గంటలూ చంద్రబాబుకు అందుబాటులో ఉండేలా వైద్యులను నియమించారు. ఆయనకు ఇంటి భోజనమే అందిస్తున్నారు కదా... మరి మీరు అందించే భోజనమే తింటున్నప్పుడు చంద్రబాబు బరువు ఎందుకు తగ్గుతారు? మరి మీరేం భోజనం పెడుతున్నారో!
వీళ్ల తాపత్రయం అంతా అర్జెంటుగా చంద్రబాబును బయటికి తీసుకురావాలనే. బయట ఆసుపత్రిలో చేర్చితే ఎలాగో పైరవీ చేయొచ్చనుకుంటున్నారు. ఎలాగూ వ్యవస్థలను మేనేజ్ చేయగలరు కదా! ఆ తర్వాత ఈ రాష్ట్రంలో మాకు భద్రత లేదు అని చెప్పి హైదరాబాద్ వెళతారు. ఇంట్లోనే ఖైదీగా ఉంటానని చంద్రబాబు మొదటే అడిగాడు కదా... అలాంటి వ్యక్తి దేనికైనా తెగిస్తాడు.
రిమాండ్ లో ఉండడం అనేది కూడా శిక్ష వంటిదే... తప్పదు. కానీ చంద్రబాబు హుందాగా వ్యవహరిస్తే గౌరవంగా ఉంటుంది. అలా కాకుండా, ప్రపంచమంతా నీ కోసం ఏడ్వాలి, నీ కోసం ప్లేట్లు కొట్టి, కొవ్వొత్తులు వెలిగించాలి, అర్జంటుగా నిన్ను బయటికి తీసుకురావాలి, నీకు అన్ని సౌకర్యాలు కల్పించాలి... వీటి కోసం కొట్లాడే నువ్వు గతంలో ముఖ్యమంత్రివి, 45 ఏళ్ల రాజకీయ కెరీర్ ఉన్న నేతవు! దేశంలో చక్రం తిప్పాను, వెలుగు వెలిగాను అని చెప్పుకునే నువ్వు బంధువులను బీజేపీలోకి తోసి వాళ్లతో పైరవీలు చేయించి బయటికి ఎలా రావాలని ప్రయత్నిస్తున్నావే తప్ప, ఓ రాజకీయ నాయకుడిగా ఏమైనా ఆలోచిస్తున్నావా?
సినిమా రిలీజ్ అయితే టికెట్ తెప్పించుకోవాలి, బాగున్న చోట సీటింగ్ ఉండేలా చూసుకోవాలి అని ఆలోచించే చిల్లర బాపతు చంద్రబాబు. జైల్లో అయితే కుషన్ బాగుండాలి, ఏసీ పెట్టించుకోవాలి... ఇదే తంతు. ఓవైపు, దేనికైనా నిలబడతాడు, రొమ్ము చూపిస్తాడు, చొక్కా విప్పుతాడు, ఎంత వయసైనా యంగ్ గా ఉంటాడు అని చెబుతారు... మరోవైపు, ఎప్పుడు పోతాడో తెలియదు... ఆయన పట్ల ఇంత దుర్మార్గంగా వ్యవహరిస్తారా? అంటూ రాద్ధాంతం చేస్తారు. మీడియా ద్వారా వాస్తవాలు గనుక బయటికి వెళ్లకపోతే... నిజంగానే చంద్రబాబును రాచిరంపాన పెడుతున్నారని, హింసిస్తున్నారని అనుకుంటారు.
దయచేసి అందరూ అర్ధం చేసుకోవాలి... ఆయన ఒక ఖైదీ. అందరు ఖైదీలు ఎలా ఉంటారో ఆయన కూడా అలాగే ఉండాలి. ఆ దిశగా ప్రభుత్వం అన్ని చర్యలూ తీసుకుంటుంది. అలా కాకుండా కారవాన్ లు పంపించి, ఏసీలు పెట్టాలంటే కుదరదు... అలాంటప్పుడు జైళ్లు ఎందుకు? నువ్వు తప్పు చేశావు, బయట ఉండకూడదు కాబట్టి జైలులో ఉంచారు... దాన్ని ఎదుర్కోవాల్సిందే. వాతావరణం మారినప్పుడు వచ్చే సమస్యలే చంద్రబాబుకు వస్తున్నట్టుంది... వాటిని ఆయన భరించాల్సిందే" అని సజ్జల స్పష్టం చేశారు.
