Gareth Morgan: క్రికెట్‌లో మరో అద్భుతం.. ఒకే ఓవర్‌లో ఆరు వికెట్లు తీసిన ఆస్ట్రేలియా క్రికెటర్
- చివరి ఓవర్‌లో ఐదు పరుగులు అవసరమైన వేళ బౌలర్ మ్యాజిక్
- ఆరు బంతుల్లో ఆరు వికెట్లు తీసి ప్రత్యర్థికి షాకిచ్చిన గారెత్ మోర్గాన్
- ఆస్ట్రేలియాలోని జిల్లా క్రికెట్ క్లబ్‌లో ఘటన
క్రికెట్‌లో మరో అద్భుతం ఆవిష్కృతమైంది. ఇప్పటి వరకు ఓవర్‌లో ఆరు బంతులను సిక్సర్లుగా మలిచిన ఘటనలు మాత్రమే చూశాం. ఇప్పుడు ఏకంగా ఆరు బంతుల్లో ఆరు వికెట్లు తీసి ఆస్ట్రేలియన్ క్రికెటర్ ఒకరు సరికొత్త రికార్డు సృష్టించాడు. ఆస్ట్రేలియాలోని జిల్లా క్రికెట్ క్లబ్‌లో జరిగిందీ ఘటన. చివరి ఓవర్‌లో ప్రత్యర్థి జట్టు విజయానికి ఐదు పరుగులు అవసరమైన వేళ ఈ ఇన్‌క్రెడిబుల్ ఫీట్ సాధించాడా బౌలర్.
గోల్డ్‌కోస్ట్ ప్రీమియర్ లీగ్ డివిజన్ 3లో మడ్గీరాబా నెరాంగ్ క్లబ్‌కు సారథ్యం వహిస్తున్న గారెత్ మోర్గాన్ అ ఘనత సాధించాడు. 40 ఓవర్ల మ్యాచ్‌లో సర్ఫెర్స్ పారాడైజ్ జట్టు 178 పరుగుల విజయ లక్ష్యంతో బరిలోకి దిగింది. 39 ఓవర్లలో నాలుగు వికెట్లు నష్టపోయి 174 పరుగులు చేసింది. చివరి ఓవర్‌లో ఆ జట్టు విజయానికి 5 పరుగులు మాత్రమే అవసరమైన వేళ మోర్గాన్ కోలుకోలేని దెబ్బ తీశాడు.