Jersey City Fire Accident: అమెరికాలో భారతీయులున్న భవనంలో అగ్నిప్రమాదం!
- న్యూజెర్సీ రాష్ట్రంలోని జెర్సీ నగరంలోగల భవనంలో ఘటన
- భారత్‌కు చెందిన 11 మంది విద్యార్థులు, మరో జంట భవనంలో నివాసం
- భారతీయులందరూ క్షేమంగా ఉన్నారని భారత ఎంబసీ ప్రకటన
- వారందరికీ అవసరమైన సహాయసహకారాలు అందిస్తున్నామని వెల్లడి
అమెరికాలోని న్యూజెర్సీ రాష్ట్రంలోగల జెర్సీ నగరంలో గురువారం అగ్నిప్రమాదం సంభవించింది. నెల్సన్ ఎవెన్యూ ప్రాంతంలో భారతీయులు నివాసముంటున్న ఓ భవనంలో ఈ ప్రమాదం జరిగింది. అయితే, భవనంలోని భారతీయులందరూ క్షేమంగా ఉన్నారని భారతీయ ఎంబసీ తెలిపింది. ఆ బిల్డింగ్‌లో భారత్‌కు చెందిన 11 మంది విద్యార్థులు, ఓ జంట నివసిస్తున్నారు. వారితో నిరంతరం టచ్‌లో ఉన్నట్టు ఎంబసీ పేర్కొంది. అన్ని రకాల సహాయ సహకారాలూ అందిస్తున్నామని పేర్కొంది. ఘటనపై స్పందించిన నగర అగ్నిమాపక శాఖ.. ప్రమాదంపై త్వరలో నివేదిక విడుదల చేస్తామని తెలిపింది. ఘటనకు గల కారణాలను మాత్రం వెల్లడించలేదు.
