Man Chases Mother: కన్నతల్లిని వెంబడించి మరీ కొట్టిన కొడుకు.. చోద్యం చూసిన జనం.. వీడియో ఇదిగో!
- యూపీలోని బులంద్ షహర్ లో దారుణం
- స్థానికుడు ఒకరు వీడియో తీయడంతో వెలుగులోకి..
- నిందితుడిని అరెస్టు చేసిన పోలీసులు
ఉత్తరప్రదేశ్ లోని బులంద్ షహర్ లో అమానవీయ ఘటన చోటుచేసుకుంది. ఓ యువకుడు కన్నతల్లి రోడ్డుపై పరుగెడుతుంటే ఆమెను వెంబడించి మరీ కొట్టాడు. చేతిలో కట్టె పట్టుకుని నింపాదిగా నడుస్తూ వస్తుండగా.. కొడుకుకు అందకుండా ఆ తల్లి పడుతూ లేస్తూ పరిగెత్తడం వీడియోలో కనిపిస్తోంది. సాయం చేయాలంటూ అరుస్తూ ఆ తల్లి పరిగెత్తడం చూస్తే హృదయం ద్రవించిపోతోంది. ఓ గుడి ఆవరణలో ఇదంతా జరుగుతున్నా చుట్టుపక్కల ఉన్న జనం చోద్యం చూస్తూ నిలబడ్డారే కానీ ఆ తల్లికి ఎవరూ సాయం చేయలేదు. చివరకు తల్లిని దొరకబుచ్చుకున్న ఆ యువకుడు కట్టెతో విచక్షణారహితంగా కొట్టాడు.
అక్కడే ఉన్న స్థానికుడు ఒకరు ఈ దారుణాన్ని తన సెల్ ఫోన్ కెమెరాలో బంధించి సోషల్ మీడియాలో పోస్టు చేశాడు. దీంతో ఈ వీడియో వైరల్ గా మారింది. ఎట్టకేలకు స్పందించిన జనం.. ఆ యువకుడిని పట్టుకుని తల్లిని కాపాడారు. స్థానికుల సమాచారంతో అక్కడికి చేరుకున్న పోలీసులకు యువకుడిని అప్పగించారు. ఈ ఘటనపై కేసు నమోదు చేసుకుని దర్యాఫ్తు చేస్తున్నట్లు పోలీసులు వివరించారు.
