Crime: తండ్రిని కడతేర్చిన కుమార్తె... నచ్చని పెళ్లి సంబంధం తీసుకువచ్చాడని ఘాతుకం
- అన్నమయ్య జిల్లాలో ఘోరం
- మదనపల్లె జీఆర్టీ స్కూల్లో టీచర్ గా పనిచేస్తున్న దొరస్వామి
- కుమార్తెకు పెళ్లి సంబంధాలు చూస్తున్న వైనం
- కుమార్తె వద్దని చెప్పినా ఓ సంబంధం ఖాయం చేసేందుకు యత్నం
- చపాతీ కర్ర, ఇనుపరాడ్డుతో తండ్రిని కొట్టి చంపిన కుమార్తె
అన్నమయ్య జిల్లాలో ఘోరం జరిగింది. ఓ యువతి కన్నతండ్రినే కడతేర్చింది. అసలేం జరిగిందంటే... మదనపల్లె జీఆర్టీ స్కూల్లో దొరస్వామి అనే వ్యక్తి ఉపాధ్యాయుడిగా పనిచేస్తున్నారు. పెళ్లీడుకు వచ్చిన కుమార్తెను ఓ ఇంటిదాన్ని చేసేందుకు ఆయన సంబంధాలు చూడడం మొదలుపెట్టారు.
ఓ సంబంధం తీసుకువచ్చేందుకు దొరస్వామి ప్రయత్నించారు. ఆ సంబంధం తనకు నచ్చలేదని, తీసుకురావొద్దని కుమార్తె చెప్పింది. అయిన్పటికీ ఆ ఉపాధ్యాయుడు వినిపించుకోలేదు.
దాంతో తీవ్ర ఆగ్రహం వ్యక్తం చేసిన కుమార్తె... చపాతీలు చేసే కర్రతోనూ, ఇనుపరాడ్డుతోనూ తండ్రిపై దాడి చేసింది. తీవ్ర గాయాలపాలైన తండ్రి దొరస్వామి మృతి చెందారు. దీనిపై కేసు నమోదు చేసుకున్న స్థానిక పోలీసులు ఆ ఉపాధ్యాయుడి కుమార్తెను అదుపులోకి తీసుకున్నారు.
