Attack On Trump: ట్రంప్ పై దాడి గురించి 4 నెలల ముందే చెప్పిన చర్చ్ పాస్టర్.. వైరల్ వీడియో!
- బుల్లెట్ చెవిని తాకడం కనిపించిందన్న పాస్టర్
- ఓ ఇంటర్వ్యూలో పాస్టర్ చెప్పిన ప్రకారమే తాజా దాడి
- ప్రస్తుతం వైరల్ గా మారిన నాటి ఇంటర్వ్యూ వీడియో
అమెరికా మాజీ అధ్యక్షుడు డొనాల్డ్ ట్రంప్ పై దాడిని ఓ చర్చ్ పాస్టర్ ముందే ఊహించారు.. ట్రంప్ పై దాడి జరగడం తనకు కనిపించిందని నాలుగు నెలల కిందటే ఆయన చెప్పారు. దాడికి సంబంధించి తనకు కనిపించిన వివరాలను ఓ ఇంటర్వ్యూలో చెప్పారు. ఈ ఏడాది మార్చి 14న యూట్యూబ్ లో విడుదల చేసిన సదరు వీడియోలో పాస్టర్ చెప్పినట్లే తాజాగా దాడి జరిగింది. దీంతో నాటి ఇంటర్వ్యూ వీడియో ప్రస్తుతం సోషల్ మీడియాలో వైరల్ గా మారింది.
ఇంటర్వ్యూలో పాస్టర్ మాట్లాడుతూ.. ఓ ఎన్నికల ర్యాలీలో ట్రంప్ పై హత్యాయత్యం జరుగుతుందని చెప్పారు. ఆ సంఘటన తన కళ్లముందు కనిపిస్తోందని, ఒక బుల్లెట్ ట్రంప్ శరీరానికి అత్యంత సమీపంలో నుంచి దూసుకెళ్లిందని వివరించారు. బుల్లెట్ చెవిని గాయపరచడంతో ట్రంప్ మోకాళ్లపై కూర్చుని దేవుడిని ప్రార్థించాడని తెలిపారు. ఆ తర్వాత ఎన్నికల్లో ట్రంప్ గెలిచి అధ్యక్ష పదవి చేపట్టడం చూస్తున్నానని పాస్టర్ చెప్పారు. ఈ వివరాలన్నీ ఈ ఏడాది మార్చిలోనే పాస్టర్ వెల్లడించారు. తాజా దాడి సరిగ్గా పాస్టర్ చెప్పినట్లే జరగడం గమనార్హం. కాగా, ఈసారి ప్రెసిడెన్షియల్ ఎన్నికల్లో ట్రంప్ గెలుస్తాడని, అధ్యక్ష ఎన్నికల తర్వాత దేశంలో ఆర్థిక సంక్షోభం ఏర్పడుతుందని కూడా సదరు పాస్టర్ వెల్లడించారు.
