Nara Lokesh: గల్ఫ్ బాధితుల జీవితాల్లో వెలుగులు నింపిన మంత్రి నారా లోకేశ్
- ఎడారి కష్టాల నుంచి విముక్తి కల్పించిన యువనేత
- గోడు వినగానే ఎన్ఆర్ఐ టీడీపీని అప్రమత్తం చేసిన మంత్రి
- జీవితాంతం రుణ పడి ఉంటామంటున్న బాధితులు
రాజకీయాల్లో అడుగుపెట్టినప్పటి నుంచి అధికారంతో సంబంధం లేకుండా నిత్యం ప్రజల్లో ఉంటూ నేటి యువతకు రోల్ మోడల్‌గా నిలుస్తున్నారు మంత్రి నారా లోకేశ్. సమస్య ఏదైనా తన వద్దకు వచ్చిన వెంటనే స్పందించడం, పరిష్కారం అయ్యే వరకూ వెంటపడటం ఆయన నిబద్ధతకు అద్దం పడుతోంది. చాలీచాలని ఆదాయంతో బతుకు భారంగా మారిన కొందరు సగటు జీవులు కష్టాల కడలి నుంచి గట్టేందుకు ఎడారి దేశాలకు వెళ్లి ఏజంట్ల చేతిలో మోసపోగా, నేనున్నానంటూ వారికి ఆపన్నహస్తం హస్తం అందిస్తున్నారు లోకేశ్. ఏజంట్ల మోసానికి గురై గల్ఫ్‌లో చిక్కుకున్న దాదాపు 20మందిని స్వస్థలాలకు రప్పించి వారి కుటుంబాల్లో వెలుగులు నింపారు.
తాము ఇబ్బందుల్లో ఉన్నామని వాట్సాప్, ట్విట్టర్, ఫేస్ బుక్ వంటి సోషల్ మీడియా వేదికల ద్వారా మెసేజ్ అందిన వెంటనే లోకేశ్ మెరుపువేగంతో స్పందించారు. ప్రభుత్వ పరంగానే గాక తెలుగుదేశం పార్టీకి అనుబంధంగా పనిచేసే ఎన్ఆర్ఐ టీడీపీ బృందాలను రంగంలోకి దించి ఎడారి కష్టాల నుంచి గట్టెక్కించారు. అక్కడ తాము ఎదుర్కొన్న దుర్భర పరిస్థితులను తలచుకుంటున్న బాధితులు ముగిసి పోయిందనుకున్న తమ జీవితాలకు మంత్రి లోకేశ్ ప్రాణం పోశారని మనస్ఫూర్తిగా కృతజ్ఞతలు చెబుతున్నారు. ప్రజాసేవ చేయాలంటే కేవలం అధికారం మాత్రమే ఉంటే సరిపోదని, ప్రజల కష్టాలను తన కష్టంగా భావించే మంచి మనసు కూడా ఉండాలని లోకేశ్ నిరూపించారు.
మంత్రి లోకేశ్‌కు జీవితాంతం రుణపడి ఉంటా!
ఆర్థిక పరిస్థితి బాగోలేక కుటుంబాన్ని పోషించుకోవడం కోసం కువైట్ వెళ్లాను. కనుచూపు మేరలో ఎటువంటి జనావాసాలు లేని ఎడారి ప్రాంతంలో గుర్రాలు, ఒంటెలు, కుక్కలు వంటి పెంపుడు జంతువులకు ఆహారం, నీరు అందించే పని నాకు ఇచ్చారు. అక్కడ ఏర్పాటు చేసిన భారీ షెడ్లలో ఉండటానికి ఎటువంటి కనీస సౌకర్యాలు లేవు. 50 డిగ్రీలకు పైగా మండే ఎండల్లో నీటి కోసం నేను 2 కి.మీ.ల దూరం వెళ్లాల్సి వచ్చేది. నాకు సరిగా భోజనం కూడా పెట్టేవారు కాదు. నా భార్య, బిడ్డలు గుర్తొచ్చి ఏడ్చేవాడ్ని. అక్కడ నా గోడు వినే నాథుడే లేడు. నా జీవితం ఆ ఎడారిలోనే ముగిసిపోతుందని అనుకున్నాను. నా కష్టాలను సెల్‌ఫోన్‌లో వీడియో తీసి రాష్ట్రంలో ఉన్న నా మిత్రులకు పంపాను. సోషల్ మీడియా ద్వారా నా కష్టాలను తెలుసుకున్న మంత్రి లోకేశ్ వెంటనే స్పందించారు. వారి టీమ్ సభ్యులు నేను ఉన్న ప్రాంతాన్ని కనుగొన్నారు. ఏజంట్లు నన్ను మోసం చేసిన విషయాన్ని వారికి చెప్పాను. వెంటనే వారు ఎంబసీతో మాట్లాడి నన్ను స్వదేశానికి రప్పించే ఏర్పాట్లు చేశారు. నన్ను కువైట్ ఎడారి కష్టాల నుంచి బయటకు తెచ్చి పునర్జన్మ నిచ్చిన మంత్రి లోకేశ్‌కు జీవితాంతం రుణపడి ఉంటాను.
చింతపర్తి శివ, వాల్మీకిపురం మండలం, అన్నమయ్య జిల్లాముక్కు, నోట్లో నుంచి రక్తంపడినా కనికరించలేదు
ఇక్కడ చాలీచాలని ఆదాయంతో బిడ్డలను పోషించుకునే దారిలేక హౌస్ మెయిడ్ పనికోసం ఏజంట్ ద్వారా ఒమన్ వెళ్లాను. అక్కడకు వెళ్లాక రేయింబవళ్లు పనిచేయించేవారు. ముక్కు, నోటి నుంచి రక్తం వచ్చినా అక్కడ నన్ను పట్టించుకునేవారు లేరు. ఆ సమయంలో బిడ్డలు గుర్తొచ్చి కుమిలికుమిలి ఏడ్చాను. ఏజంట్లు నన్ను మోసం చేసిన విషయాన్ని నా మామ, మరిదిలకు ఫోన్‌లో తెలియపర్చాను. నేను ఫోన్‌లో మాట్లాడుతున్నానని తెలిసి నా ఫోన్ కూడా లాగేసుకున్నారు. మా కుటుంబసభ్యులు రాజానగరంలో టీడీపీ నాయకుల ద్వారా విషయాన్ని మంత్రి లోకేశ్‌కు చేరవేశారు. వెంటనే ఆయన ఒమన్ లోని ఎన్ఆర్ఐ టీడీపీ నాయకులకు చెప్పడంతో వారు నేను ఉన్న ప్రాంతాన్ని గుర్తించారు. తొలుత లక్షరూపాయలు ఇస్తేగానీ నన్ను వెనక్కి పంపనని అక్కడ ఏజంట్ చెప్పారు. తర్వాత ఆ దేశంలోని ఎన్ఆర్ఐ టీడీపీ నాయకులు ఏజంటు, ఎంబసీతో మాట్లాడి నన్ను స్వస్థలానికి పంపించారు. ఆ నరకం నుంచి మళ్లీ ఇంటికి రావడానికి మంత్రి లోకేశ్ చేసిన సాయం నా జీవితాంతం గుర్తుంటుంది.
కొత్తపల్లి ప్రియాంక, రఘునాథపురం, రాజానగరం మండలంవారంరోజులు చీకటిగదిలో బంధించారు
దుబాయ్ సేఠ్ ఇంటిలో వంట పనికోసమని చెబితే ఏజంటు ద్వారా మస్కట్ వెళ్లాను. అక్కడకు వెళ్లగానే నా ఫోను, పాస్ పోర్టు లాగేసుకున్నారు. 3 రోజులకు ఒకసారి మాత్రమే నా కుటుంబ సభ్యులతో ఫోన్ మాట్లాడనిచ్చేవారు. భారీ బిల్డింగ్ మూడు ఫ్లోర్లను శుభ్రం చేయడం, వంటపని, పిల్లలను చూసుకునే పనులన్నీ నా ఒక్కదానితోనే విశ్రాంతి లేకుండా చేయించేవారు. సమయానికి సరైన భోజనం కూడా ఉండేది కాదు. నేను పడుతున్న కష్టాలను కుటుంబ సభ్యులకు తెలియజేయగా, వారి ద్వారా మస్కట్ లోని ఎంబసీకి ఫిర్యాదు చేశాను. ఈ విషయం తెలుసుకొని వారంరోజుల పాటు నన్ను చీకటిగదిలో బంధించారు. అక్కడి ఏజంట్ నాపై చేయికూడా చేసుకున్నారు. నా కుటుంబ సభ్యులు నా సమస్యను మంత్రి లోకేశ్ దృష్టికి తీసుకెళ్లడంతో, అక్కడ ఉన్న వాళ్ల టీమ్ సభ్యులు ఎంబసీద్వారా ఏజంటుతో మాట్లాడి నన్ను విడిపించి స్వదేశానికి రప్పించారు. నేను స్వస్థలానికి వచ్చి 2 నెలలైంది. భీమవరంలోని ఒక హాస్పిటల్ లో నర్సుగా పనిచేస్తున్నాను. మంత్రి లోకేశ్ చేసిన సాయాన్ని నేను, నా కుటుంబసభ్యులు ఎప్పటికీ మర్చిపోము. ఆయనకు మా కృతజ్ఞతలు.
-చిగురుపాటి బేబి, భీమవరం, పశ్చిమగోదావరి జిల్లా
తిరిగి వస్తానని అనుకోలేదు
వంట పని కోసమని చెబితే ఏజంట్ ద్వారా కువైట్ వెళ్లాను. తీసుకెళ్లేటపుడు నెలకు రూ.52 వేల జీతం అని చెప్పారు. అక్కడకు వెళ్లాక హౌస్ మెయిడ్ పని అప్పగించారు. నేను మోసపోయానని అర్థమైంది. రోజుకు 20 గంటలకు పైగా పనిచేయించేవారు. నెలరోజులు గడిచాక 22 వేలు మాత్రమే ఇచ్చారు. మోసపోయిన విషయాన్ని నా భర్తకు తెలియజేశాను. కారిడార్, లాన్లు శుభ్రం చేయడంతోపాటు ప్రతిరోజూ 13 బాత్రూమ్‌లు కడిగించేవారు. విరామం లేకుండా పనిచేయడంతో ఎడమ చేయి నరం దెబ్బతింది. అక్కడ 3సార్లు హాస్పిటల్‌కు తీసుకెళ్లినా నయం కాలేదు. నేను పడుతున్న ఇబ్బందులను నా భర్తకు చెప్పడంతో ఆయన ఎమ్మెల్యే రామకృష్ణారెడ్డిగారి ద్వారా మంత్రి లోకేశ్ దృష్టికి తీసుకెళ్లారు. విషయం తెలుసుకున్న వెంటనే ఆయన ఎన్ఆర్ఐ టీడీపీ నాయకులను అలర్ట్ చేశారు. కువైట్‌లో ఉన్న ఎన్ఆర్ఐ టీడీపీ వారు ఎంబసీ, ఏజంట్లతో మాట్లాడి నన్ను స్వస్థలానికి పంపించే ఏర్పాట్లు చేశారు. అక్కడ తీవ్ర అనారోగ్యం పాలైన నేను ప్రస్తుతం హైదరాబాద్‌లో ఉండి ట్రీట్‌మెంట్ తీసుకుంటున్నాను. మళ్లీ తిరిగి వస్తానో, రానోనని తీవ్ర ఆందోళనకు గురైన నన్ను ఇక్కడకు రప్పించడానికి చొరవ చూపిన మంత్రి లోకేశ్‌కు మా కుటుంబం రుణపడి ఉంటుంది.
నమిడి ప్రమీల,అనపర్తి, తూర్పుగోదావరి జిల్లాలోకేశ్బాబు చొరవ వల్లే తిరిగి రాగలిగాను
ఇంట్లో పని కోసమని చెప్పి సౌదీ తీసుకెళ్లారు. అక్కడకు వెళ్లాక ఎడారిలోని గొర్రెలు, ఒంటెలకు కాపలా పెట్టారు. సరైన భోజనం ఉండేదికాదు. నోటివెంట రక్తం పడింది, పట్టించుకునే దిక్కులేదు. నా దుస్థితిని సెల్‌లో వీడియో తీసి మిత్రులకు పంపాను. వారు ట్విట్టర్ ద్వారా మంత్రి లోకేశ్‌కు తెలియజేశారు. వెంటనే ఆయన స్పందించి ఎన్నారై టీడీపీ వారిని నా వద్దకు పంపారు. ఎంబసీతో మాట్లాడి నన్ను మళ్లీ స్వస్థలానికి రప్పించారు. లోకేశ్ బాబు చొరవ చూపకపోతే తిరిగి వచ్చేవాడిని కాదు. ఆయన మేలు జీవితంలో మర్చిపోలేను.
సరెళ్ళ వీరేంద్ర కుమార్, ఇసుకపూడి, అంబాజీపేట మండలం