Ram Gopal Varma: వర్మపై మరో కేసు నమోదు
- చంద్రబాబు, పవన్, లోకేశ్ ల మార్ఫింగ్ ఫొటోల కేసు
- కేసు నమోదు చేసిన రావికమతం పోలీసులు
- ఈరోజు విచారణకు హాజరు కావాలంటూ నోటీసులు
సినీ దర్శకుడు రామ్ గోపాల్ వర్మకు ఇబ్బందులు పెరుగుతున్నాయి. చంద్రబాబు, పవన్ కల్యాణ్, నారా లోకేశ్ ల మార్ఫింగ్ ఫొటోలను సోషల్ మీడియాలో పోస్ట్ చేసి, వారిని కించపరిచేలా కామెంట్లు చేసిన అంశంలో ఇప్పటికే ఆయనపై ప్రకాశం జిల్లాలో కేసు నమోదయింది. నవంబర్ 20న ఒంగోలు రూరల్ పీఎస్ లో విచారణకు రావాలని నోటీసులు ఇచ్చారు. అయితే, షూటింగ్ లో బిజీగా ఉన్నానని, విచారణకు హాజరు కావడానికి తనకు కొంత సమయం కావాలని వర్మ కోరారు. దీంతో నవంబర్ 25న విచారణకు హాజరు కావాలని నిన్న మరోసారి నోటీసులు ఇచ్చారు.
మరోవైపు, ఆయనపై మరో కేసు కూడా నమోదయింది. అనకాపల్లి జిల్లా రావికమతం పోలీసులు వర్మపై కేసు నమోదు చేశారు. చంద్రబాబు, పవన్, లోకేశ్ లపై మార్ఫింగ్ ఫొటోలకు సంబంధించే ఈ కేసు కూడా నమోదయింది. ఈరోజు (21న) విచారణకు హాజరు కావాలంటూ రావికమతం పోలీసులు నోటీసులు ఇచ్చారు. అయితే విచారణకు హాజరయ్యేందుకు వర్మ మరో వారం రోజులు సమయం కోరినట్టు తెలుస్తోంది.
