Nadeendla Manohar: ప్రణాళికాబద్ధంగా సాగాల్సిన అమరావతి నిర్మాణానికి గండి కొట్టారు: మంత్రి నాదెండ్ల

అమరావతి రాజధానిని అభివృద్ధి పథంలో నడిపించేందుకు తమ కూటమి ప్రభుత్వం పూర్తి నిబద్ధతతో ఉందని రాష్ట్ర పౌరసరఫరాలు, వినియోగదారుల వ్యవహారాల శాఖ మంత్రి, జనసేన పార్టీ పీఏసీ చైర్మన్ నాదెండ్ల మనోహర్ స్పష్టం చేశారు. రాజధాని కోసం రైతులు చేసిన త్యాగాల పునాదిపైనే కూటమి ప్రభుత్వం ఏర్పడిందని ఆయన అన్నారు. గుంటూరు జిల్లా మంగళగిరి మండలం బేతపూడి గ్రామంలోని రామాలయం సెంటర్ వద్ద రావి చెట్టు కింద జనసేన పార్టీ ఆధ్వర్యంలో నిర్వహించిన 'రచ్చబండ' కార్యక్రమంలో మంత్రి పాల్గొన్నారు.

ఈ సందర్భంగా నాదెండ్ల మనోహర్ మాట్లాడుతూ.. కేవలం ప్రశ్నించడమే కాకుండా, ప్రజల సమస్యలను పరిష్కరించే స్థాయికి జనసేన పార్టీ చేరుకుందని తెలిపారు. అమరావతి రాజధాని నిర్మాణాన్ని గత ప్రభుత్వం పూర్తిగా నిర్లక్ష్యం చేసిందని, మూడు రాజధానుల పేరుతో రైతులను, ప్రజలను మోసం చేసిందని ఆయన ఆరోపించారు. వైఎస్ జగన్మోహన్ రెడ్డి ప్రభుత్వ నిర్ణయాల వల్ల రాష్ట్రం తిరోగమనం పట్టిందని, ప్రణాళికాబద్ధంగా సాగాల్సిన అమరావతి నిర్మాణానికి గండి కొట్టారని విమర్శించారు. అమరావతి రాజధాని లేకపోతే రాష్ట్ర ప్రజలకు ఒక గుర్తింపు, చిరునామా లేకుండా పోతుందని ఆయన అభిప్రాయపడ్డారు.

అమరావతిని పునర్నిర్మించే ప్రక్రియను ప్రణాళికాబద్ధంగా చేపడుతున్నామని మంత్రి వివరించారు. సీఆర్డీఏ పరిధిలోని 29 గ్రామాల్లో రహదారులు, భవనాలు వంటి మౌలిక సదుపాయాల కల్పనకు ప్రాధాన్యత ఇస్తున్నామని తెలిపారు. గ్రామాల్లో నెలకొన్న ప్రతి సమస్యను తెలుసుకొని, వాటి పరిష్కారానికి చిత్తశుద్ధితో కృషి చేస్తామని హామీ ఇచ్చారు. అమరావతి నిర్మాణానికి భూములిచ్చిన రైతులను అభివృద్ధి కార్యక్రమాల్లో భాగస్వాములను చేస్తామని నాదెండ్ల మనోహర్ భరోసా ఇచ్చారు.

ఈ కార్యక్రమంలో ఎర్రబాలెం, బేతపూడి, అయినవోలు గ్రామాల ప్రజలతో పాటు కూటమి పార్టీల నాయకులు, జనసేన కార్యకర్తలు పెద్ద సంఖ్యలో పాల్గొన్నారు. తమ సమస్యలను మంత్రి దృష్టికి తీసుకువచ్చారు.