Sunrisers Hyderabad: మరో పోరుకు సిద్ధమైన సన్ రైజర్స్... టాస్ గెలిచిన ఆర్సీబీ

ఐపీఎల్ లో నేడు రాయల్ ఛాలెంజర్స్ బెంగళూరు (ఆర్‌సీబీ), సన్‌రైజర్స్ హైదరాబాద్ (ఎస్‌ఆర్‌హెచ్) జట్ల మధ్యమ్యాచ్ జరగనుంది. లక్నోలోని భారతరత్న శ్రీ అటల్ బిహారీ వాజ్‌పేయి ఏకానా క్రికెట్ స్టేడియం ఈ కీలక పోరుకు ఆతిథ్యం ఇవ్వనుంది. ఈ మ్యాచ్‌లో టాస్ గెలిచిన ఆర్‌సీబీ తాత్కాలిక కెప్టెన్ జితేష్ శర్మ తొలుత ఫీల్డింగ్ ఎంచుకున్నాడు. 

ఈ మ్యాచ్‌లో గెలిస్తే ఆర్‌సీబీ దాదాపుగా టాప్-2 స్థానాన్ని ఖాయం చేసుకుంటుంది. ఇప్పటికే నిరాశాజనకమైన ప్రదర్శనతో సతమతమవుతున్న సన్‌రైజర్స్ హైదరాబాద్, ఈ మ్యాచ్‌లో గెలిచి, ఆదివారం నాడు కోల్‌కతా నైట్ రైడర్స్‌తో జరిగే తమ చివరి లీగ్ మ్యాచ్‌కు ముందు కొంత ఆత్మవిశ్వాసం పొందాలని భావిస్తోంది. ఆర్సీబీ జట్టు ఇప్పటికే ప్లే ఆఫ్స్ చేరగా, సన్ రైజర్స్ ఎలిమినేట్ అయింది.

లక్నో పిచ్ బ్యాటింగ్‌కు అనుకూలంగా ఉంటుందని అంచనా. ఆరంభంలో బౌలర్లకు కొద్దిగా సహకరించినా, మొత్తంగా బ్యాటర్లకు పండుగే అని చెప్పొచ్చు. ముఖ్యంగా ఫ్లడ్‌లైట్ల వెలుతురులో పిచ్ మరింత మెరుగ్గా స్పందించే అవకాశం ఉంది. దీంతో టాస్ గెలిచిన జట్టు ఫీల్డింగ్ ఎంచుకోవడానికే మొగ్గుచూపుతుంది. ఇక వాతావరణం విషయానికొస్తే, లక్నోలో వాతావరణం వేడిగా, ఉక్కపోతగా ఉంటుందని, వర్షానికి ఆస్కారం లేదని తెలుస్తోంది.