TTD: తిరుమల శ్రీవారి భక్తులకు గమనిక

తిరుమల శ్రీవారి దర్శనార్థం శ్రీవారిమెట్టు మార్గంలో నడిచివెళ్లే భక్తులకు తిరుమల తిరుపతి దేవస్థానం (టీటీడీ) కీలక సమాచారం అందించింది. శ్రీవారిమెట్టు వద్ద ప్రస్తుతం కేటాయిస్తున్న దివ్యదర్శనం టోకెన్ల జారీ కౌంటర్లను తాత్కాలికంగా అలిపిరిలోని భూదేవి కాంప్లెక్స్‌కు మార్చుతున్నట్లు టీటీడీ ప్రకటించింది. ఈ నూతన కౌంటర్లు జూన్ 6వ తేదీ సాయంత్రం నుంచి భక్తులకు అందుబాటులోకి రానున్నాయి.

శ్రీవారిమెట్టు మార్గంలో కాలినడకన కొండపైకి వెళ్లే భక్తుల సౌలభ్యం కోసం టీటీడీ ఈ నిర్ణయం తీసుకుంది. శుక్రవారం సాయంత్రం నుంచి అలిపిరిలోని భూదేవి కాంప్లెక్స్‌లో నిర్దేశించిన కౌంటర్ల ద్వారా దివ్యదర్శనం టోకెన్ల జారీ ప్రక్రియ ప్రారంభమవుతుంది. టోకెన్ల లభ్యతను బట్టి, ముందుగా వచ్చిన వారికి ముందు ప్రాతిపదికన (ఫస్ట్ కమ్ ఫస్ట్ సర్వ్డ్) ఈ టోకెన్లను కేటాయిస్తారు. శనివారం నాటి శ్రీవారి దర్శనం కోసం టోకెన్లను శుక్రవారం సాయంత్రమే మంజూరు చేయనున్నారు. భక్తులు తమ ఆధార్ కార్డును తప్పనిసరిగా చూపించి ఈ దివ్యదర్శనం టోకెన్లను పొందాల్సి ఉంటుంది.

దివ్యదర్శనం టోకెన్లు పొందిన భక్తులు, శ్రీవారిమెట్టు మార్గంలోని 1,200వ మెట్టు వద్ద ఏర్పాటు చేసిన స్కానింగ్ పాయింట్‌లో తమ టోకెన్‌ను స్కాన్ చేయించుకోవాలి. ఆ తర్వాతే వారిని దర్శనానికి అనుమతిస్తారు. కేవలం దివ్యదర్శనం టోకెన్లు మాత్రమే కాకుండా, సర్వదర్శనం (ఎస్‌ఎస్‌డీ) టోకెన్లను కూడా అలిపిరిలోని భూదేవి కాంప్లెక్స్‌లో కౌంటర్ల ద్వారానే అందించనున్నట్లు టీటీడీ స్పష్టం చేసింది.

భక్తుల రద్దీని దృష్టిలో ఉంచుకుని, ఎలాంటి భద్రతాపరమైన లేదా ట్రాఫిక్ పరమైన సమస్యలు తలెత్తకుండా పటిష్టమైన చర్యలు తీసుకోవాలని టీటీడీ ఈవో సంబంధిత అధికారులను ఆదేశించారు. టీటీడీ విజిలెన్స్, సెక్యూరిటీ సిబ్బందితో పాటు జిల్లా పోలీసులు సమన్వయంతో పనిచేసి, ముందస్తు జాగ్రత్తలు తీసుకోవాలని ఆయన సూచించారు.