South Indian Recipes: కేవలం 15 నిమిషాల్లో చేసుకోగలిగే సౌత్ ఇండియన్ రుచులు ఇవిగో!

ప్రస్తుత ఉరుకుల పరుగుల జీవితంలో ఉదయం సమయం చాలా విలువైంది. ఆలస్యంగా నిద్రలేవడం, పిల్లల స్కూల్ బ్యాగులు సర్దడం, అందరికీ టిఫిన్ రెడీ చేయడం వంటి పనులతో వంటిల్లు ఓ యుద్ధరంగంలా మారిపోతుంది. ఇలాంటి సమయంలో దక్షిణ భారత దేశ వంటకాలను ఇష్టపడేవారు, వాటి తయారీకి ఎక్కువ సమయం పడుతుందని ఆందోళన చెందుతుంటారు. పిండి నానబెట్టడం, పులియబెట్టడం, నెమ్మదిగా ఉడికించడం వంటివి ప్రతీ వంటకానికీ అవసరం లేదు. కొన్ని రుచికరమైన సౌత్ ఇండియన్ టిఫిన్ బాక్స్ వంటకాలను కేవలం 15 నిమిషాలు లేదా అంతకంటే తక్కువ సమయంలోనే తయారుచేసుకోవచ్చు! అలాంటి త్వరితగతిన, రుచిగా చేసుకునే 7 వంటకాలు ఇక్కడ ఉన్నాయి.

1. లెమన్ రైస్ (నిమ్మకాయ పులిహోర)
ఇది చాలా త్వరగా తయారుచేసుకోగలిగే దక్షిణ భారత వంటకాల్లో ఒకటి. దీనికి కాస్త మిగిలిన అన్నం ఉంటే చాలు. బాణలిలో నూనె వేడి చేసి ఆవాలు, కరివేపాకు, పచ్చిమిర్చి, మినపప్పు, వేరుశనగపప్పు వేసి తాలింపు వేసుకోవాలి. పసుపు, ఉప్పు వేసి, అన్నం కలపాలి. చివరగా తాజా నిమ్మరసం పిండితే సరి. దీన్ని మళ్లీ వేడి చేయాల్సిన అవసరం కూడా ఉండదు.

2. రవ్వ ఉప్మా
మెత్తగా, కడుపు నింపే ఈ వంటకం దక్షిణ భారతంలో చాలా ఫేమస్. ఇది చాలా తేలికగా, వేగంగా పూర్తవుతుంది. ముందుగా రవ్వను (ముందే వేయించనిది అయితే) వేయించుకోవాలి. తర్వాత బాణలిలో నూనె వేసి ఆవాలు, కరివేపాకు, ఉల్లిపాయలు, అల్లం, పచ్చిమిర్చి వేసి వేయించాలి. వేడి నీళ్లు, ఉప్పు వేసి, నెమ్మదిగా రవ్వను కలుపుతూ ఉండాలి. దగ్గరపడే వరకు ఉడికించాలి. మరింత పోషకాల కోసం బఠాణీలు లేదా తురిమిన క్యారెట్ కూడా వేసుకోవచ్చు.

3. టొమాటో పెసరట్టు
పెసరపప్పుతో చేసే ఈ దోశకు పిండి పులియబెట్టాల్సిన అవసరం లేదు. పప్పును రాత్రంతా నానబెడితే చాలు, ఉదయాన్నే ఇన్స్టంట్‌గా చేసుకోవచ్చు. నానబెట్టిన పెసరపప్పులో టొమాటోలు, అల్లం, పచ్చిమిర్చి, జీలకర్ర వేసి మెత్తగా రుబ్బుకోవాలి. వేడి పెనంపై దోశలా పోసి, రెండువైపులా బంగారు రంగు వచ్చేవరకు కాల్చుకోవాలి. ఇది చట్నీ లేదా పెరుగుతో చాలా రుచిగా ఉంటుంది.

4. ఇన్ స్టంట్ రాగి దోశ
పిండి లేదా? ఫర్వాలేదు. రాగి పిండి, బియ్యం పిండి, పెరుగు, నీళ్లు, తరిగిన ఉల్లిపాయలు, పచ్చిమిర్చి, కొత్తిమీర కలిపి పల్చని పిండిలా చేసుకోవాలి. దీన్ని వేడి పెనంపై రవ్వ దోశలా పోసి, కరకరలాడే వరకు కాల్చుకోవాలి. రాగిలో ఐరన్, కాల్షియం ఎక్కువగా ఉండటం వల్ల ఇది ఆరోగ్యకరమైన, శక్తినిచ్చే టిఫిన్.

5. వెజిటబుల్ సేమియా (రైస్ నూడుల్స్ ఫ్రై)
సమయం తక్కువగా ఉన్నప్పుడు రైస్ సేమియా లేదా ఇడియప్పం గొప్ప ఎంపిక. రెడీ-టు-కుక్ రైస్ వెర్మిసెల్లీ వాడితే, కేవలం వేడి నీటిలో నానబెట్టి నీళ్లు వార్చేస్తే సరిపోతుంది. బాణలిలో ఆవాలు, మినపప్పు, కరివేపాకు, ఉల్లిపాయలు వేసి తాలింపు వేయాలి. తురిమిన క్యారెట్, క్యాప్సికమ్ లేదా త్వరగా ఉడికే కూరగాయలు వేసుకోవచ్చు. చివరగా సేమియా, ఉప్పు, కొద్దిగా నిమ్మరసం వేసి కలపాలి. ఇది స్కూల్ లేదా ఆఫీస్ టిఫిన్ బాక్సులకు చక్కగా సరిపోతుంది.

6. పోడి ఇడ్లీ
మిగిలిన ఇడ్లీలు ఉన్నాయా? వాటితో చిటికెలో పోడి ఇడ్లీ చేసేయొచ్చు! కొద్దిగా నెయ్యి లేదా నూనె వేడి చేసి, ఆవాలు, కరివేపాకు, తరిగిన ఇడ్లీ ముక్కలు వేయాలి. పైన ఇడ్లీ పొడి చల్లి బాగా కలపాలి. ఇది కారంగా, కరకరలాడుతూ చాలా రుచిగా ఉంటుంది. గది ఉష్ణోగ్రతలో కూడా బాగుంటుంది.

7. పెరుగు అన్నం (దద్దోజనం)
సులభంగా జీర్ణమయ్యే, కడుపుకు చల్లదనాన్నిచ్చే పెరుగు అన్నం టిఫిన్ బాక్సులకు మంచి ఆప్షన్. ఉడికిన అన్నంలో చిక్కటి పెరుగు, కొద్దిగా పాలు (పులిసిపోకుండా ఉండటానికి), ఉప్పు వేసి కలపాలి. ఆవాలు, అల్లం, కరివేపాకు, పచ్చిమిర్చితో తాలింపు వేసి కలుపుకోవాలి. దానిమ్మ గింజలు లేదా ద్రాక్ష పళ్లు కూడా వేసుకుంటే మరింత రుచిగా ఉంటుంది.

ఈ వంటకాలు త్వరగా అవ్వడమే కాకుండా, ఇంట్లో వండిన భోజనం తిన్న అనుభూతినిస్తాయి. కాబట్టి, తదుపరిసారి సమయం లేక ఖాళీ టిఫిన్ బాక్సుతో ఏం చేయాలో తెలియక తికమకపడితే, ఈ వంటకాలను తప్పకుండా ప్రయత్నించండి!